Ngế pro xiâm hnê ngăn tơnêi têa Phạm Minh Chính mơnhên Việt Nam đi đo nhuô̆m tơrŭm cheăng nhŏng o tiô khôi vâi krâ nah ƀă tơrŭm hên tơdroăng ki lĕm ƀă kong têa Hungary ƀă tơdroăng mơnhông mơdêk lối 70 hơnăm, pơkâ thế péa pâ rak tơpui tơno khu râ kăn xiâm ƀă mâu râ, thăm tơrŭm tung mâu ƀâng, mâu kơvâ cheăng, tung mê ai kơvâ hnê arak luât.

Ngế xiâm pơkuâ hnê arak luât kong têa Hungary rơkâu ƀă tối ía ‘nâng hlo mâu tơdroăng mơnhông, tơtêk cheăng kâ hôm ‘nâng dêi Việt Nam tung pơla cheăng kâ lâp plâi tơnêi dế trâm hên pá puât. Ngế xiâm mơnhên Hungary pói vâ tơrŭm cheăng tâ mê nếo ƀă Việt Nam tung kơvâ luât, ki má lối cho tung mâu tơdroăng xiâm Ngế pro xiâm hnê ngăn tơnêi têa hiăng tơpui tơno, tơdrêng amê tối ăm ‘nâi, Hungary kô tŏng kum 200 hnoăng liăn hriâm rơkê hnê mơjiâng ‘na arak luât ăm Việt Nam.