Hneăng hôp kố cho vâ pơtối pêi inhên mâu troăng pơkâ pêi, troăng prôk, troăng hơlâ dêi Đảng, Tơnêi têa ‘na mơnhông kơpong tơbăng kroăng Hồng, kơpong ki xiâm cheăng kâ peăng Kơnhŏng tơnêi têa, kơpong pơlê xiâm ƀă kong pơlê Hải Dương, ki má lối cho Pơkâ dêi Khu xiâm kal kí ‘na troăng prôk mơnhông cheăng kâ – rêh ối pơlê pơla, rak tơniăn ‘na cheăng lêng, gâk kring kơpong tơbăng kroăng Hồng troh hơnăm 2030, tơmiât pêi troh hơnăm 2045.

Xông tơpui a Hneăng hôp, Ngế pro xiâm hnê ngăn tơnêi têa Phạm Minh Chính tối nhên, Hải Dương tơkŭm hên tơmeăm ki mơnhông phá tơ-ê, roh tơ’lêi hlâu ki má môi, tơ’lêi hlâu tơbriât cheăng vâ mơnhông cheăng kâ – rêh ối pơlê pơla rĕng ƀă krá tơniăn, cho tiú troh ki má môi ƀă mâu khu mơ’no liăn cheăng tung tơnêi têa ƀă lâp plâi tơnêi, mơjiâng ivá mơnhông ăm Hải Dương ƀă troh lâp lu a kơpong tơbăng kroăng Hồng ƀă lâp tơnêi têa.

Rơtế amê Ngế pro xiâm hnê ngăn tơnêi têa pơkâ thế, mơdêk pơ’lêh cheăng kâ, ƀă pơ’lêh nếo troăng tơtêk, mơdêk ivá ƀă ivá tơbriât cheăng, tiô xiâm kối pơhlêh pêi cheăng xúa kŏng ngê̆, khoa hok kŏng ngê̆ ƀă pơ’lêh nếo troăng tơmiât pêi rơkê, mơnhông cheăng kâ krúa lĕm kong prâi, cheăng kâ đi đo tơtêk.