Hneăng hôp xua Khu xiâm ngăn tơdroăng pơkâ ƀă ‘no liăn cheăng, Kăn teăng mâ Việt Nam a Thổ Nhĩ Kỳ ƀă Hô̆i đong cheăng kâ tơpui kâ dêi Thổ Nhĩ Kỳ tơrŭm tơkŭm po. A hneăng hôp, mâu khu mơdró Việt Nam- Thổ Nhĩ Kỳ   châ tơbleăng ‘na tơmeăm khoăng ai hlâu, tơdroăng kal vâ tơrŭm ‘no liăn cheăng, tê mơdró dêi rêm pâ; tối ƀai hriâm châ ƀlêi chiâng tung tơrrŭm cheăng, mơ’no liăn mơjiâng tơmeăm khoăng. Tơbleăng a hneăng hôp, Ngế pro xiâm hnê ngăn Chin phuh Phạm Minh Chính ăm ‘nâi; Việt Nam dế tơkŭm pêi 3 tơdroăng ki vâ châ tơƀrê, púi vâ tơrŭm cheăng ‘na kơvâ cheăng kâ kơxô̆, pơ’lêh kơxô̆ lĕm krúa, cheăng kâ châ hơ’lêh, cheăng kâ ki rơrê plĕng, hnê tối ăm dêi rơpó ‘na tơdroăng cheăng kâ; xo khoa hok kơmăi kơmok, hơ’lêh hriê̆n plĕng ki nếo pro xiâm mơnhông cheăng kâ nếo. Việt Nam pro tơ’lêi má môi ăm mâu khu mơdró kân,  xúa kơmăi ki dâi lĕm, ai túa cheăng  rak ngăn, tung mê ai khu mơdró Thổ Nhĩ Kỳ  ‘no cheăng kâ tê mơdró a Việt Nam.

Tơdrêng tung hâi lơ 30/11 Ngế pro xiâm hnê ngăn Chin phuh Phạm Minh Chính tơdah Ngế xiâm ngăn liăn ngân ƀă Ngế xiâm ngăn kơvâ cheăng ƀă kơmăi kơmok ƀă kŏng ngê̆ Thổ Nhĩ Kỳ hlối lăm pôu, pêi cheăng ƀă  Grup ngăn Tơƀai ‘na rơvâ plêng Thổ Nhĩ Kỳ (TAI)- môi tung mâu grup cheăng ƀro kơmăi kơmok  ‘na lêng  ki rơkê má môi dêi Thổ Nhĩ Kỳ; lăm ngăn tíu mơđah tơbleăng um tơmeăm Anatolia, Thổ Nhĩ Kỳ.