Kố cho hneăng lăm pêi cheăng ki kal, ai hên pơxúa dêi Ngế pro xiâm hnê ngăn tơnêi têa, tung tơdroăng ki pá: Việt Nam - Nhuk nếo mơdêk tơrŭm cheăng tung tŭm tơdroăng xua vâ hơniâp lĕm ƀă kro mơdrŏng a châu Á ƀă tung lâp plâi tơnêi tung hneăng lăm pôu Nhuk dêi Kăn xiâm hnê ngăn tơnêi têa Võ Văn Thưởng a khế 11 kố nah; pakĭng mê, ASEAN - Nhuk xuân mơjiâng tơrŭm cheăng tung tŭm tơdroăng (CSP) a Hneăng hôp mâu kăn xiâm ASEAN - Nhuk rôh má 26 a kong têa Indonesia a khế 9/2023.

Ki rơhêng vâ tối, tŭm tá Việt Nam ƀă ASEAN xuân mơjiâng tơrŭm cheăng tơpui kâ ƀă Nhuk a hơnăm 1973 - kơtăn kố pơ’lăng tơdế chal. Tiô tối hdrối mâu kăn ASEAN ƀă Nhuk kô séa ngăn nếo tung tơdroăng tơrŭm cheăng 50 hơnăm hdrối ing mê vâ pơkâ mâu tơdroăng vâ pêi troăng ki mơnhông tơƀrê tung tơrŭm cheăng la ngiâ.

Pakĭng mê, Hneăng hôp kô tơbleăng 2 tơdroăng ki kal, mê cho:  “Tơbleăng mâ ngăn ‘na tơdroăng tơrŭm tơrôa ƀă ASEAN - Nhuk: tơrŭm loi nhoăm dêi rơpó”, “Pơkâ tơbleăng pêi mâu tơdroăng ki ‘nâi ‘na tơrŭm cheăng pơla ASEAN - Nhuk: Ƀă kong têa ki loi nhoăm”; vâ  mơhno ăm hlo nhên mâu tơdroăng hiăng pêi pro tung tơpui tơno dêi mâu kăn xiâm a hneăng hôp.