Hneăng hôp tơbleăng pơkâ ƀă mơhnhôk ‘no liăn mơjiâng tơmeăm khoăng pơlê kong kân Cần Thơ cho tơdroăng ki kal ƀă tơdroăng tơbleăng pêi Pơkâ pơlê kong kân, mơhnhôk tăng liăn, tơ’mot khu ‘no liăn cheăng, mơnhông cheăng kâ rêh ối dêi pơlê kong kân Cần Thơ tung la ngiâ.

Tơbleăng a hneăng hôp, Ngế pro xiâm hnê ngăn Chin phuh Phạm Minh Chính khĕn kơdeăn hlối rơkâu pơlê kong kân Cần Thơ hiăng thâ mơjiâng, pê klêi, pơtroh ăm Ngế pro xiâm hnê ngăn Chin phuh pơkâ ƀă tơbleăng Pơkâ hdró pơlê kong kân pơla hơnăm 2021-2030, tơmiât vâ pêi mâu tơdroăng cheăng troh hơnăm 2050 a Hneăng hôp hâi kố.

Ƀă pơkâ hdró dêi Pơlê kong kân Cần Thơ Ngế pro xiâm hnê ngăn tơnêi têa tối, Cần Thơ cho môi tung mâu pơlê pơlê kong kân ki châ tơmâng hên, kơxô̆ liăn ‘no cheăng kâ hên châ tơmâng khât dêi Đảng, Tơnêi têa; ai luât pơkâ pro tơ’lêi hlâu tŭm tâi tâng, tơdâng tơ’mô, tơ’lêi hlâu; ai tơdroăng pơkâ pêi ki nhên khât.