Xông tơpui a hneăng hôp, Ngế pro xiâm hnê ngăn tơnêi têa Phạm Minh Chính tối nhên tâi tâng kơvâ cheăng thế tơrŭm môi tuăn, mơ-eăm pêi vâ hmâ ƀĕng ƀeăn, pêi tơƀrê ƀă tơdroăng cheăng kâ rêh ối tiô tơdroăng rêh ối nôkố; mơ-eăm ‘mâi rơnêu, tơkâ luâ tŭm tơdroăng xơpá, pơloăng mơnúa, mơdoh pêi pro tung pơla ki tơ’lêi, tơdroăng ki nếo tung mơnhông kơvâ pêi chiâk deăng; hbrâ rơnáu,  mơ-eăm vâ tơrŭm ƀă lâp plâi tơnêi trâu rơdâ, tơdrăng khât, pơxúa.

Pêi châ tơƀrê mâu tơdroăng pơkâ tung hơnăm 2024 cho mơdêk  châ sap 3,5 - 4%. Ngế pro xiâm hnê ngăn tơnêi têa loi khât  ƀă tơdroăng hlá tơbeăng pơ’lêh nếo, hriăn chêh tơdroăng ki nếo, mơ-eăm ing xiâm tơnêi têa troh kong pơlê, kơvâ Pêi chiâk ƀă Mơnhông thôn pơlê kô pơtối mơnhông rơdêi tâ, rĕng tâ, krá ton tân, pê klêi mâu tơdroăng hiăng pơkâ, pêi châ tơƀrê tung hơnăm 2024 hên tâ hơnăm 2023; kuăn pơlê ki pêi chiâk kô rế kro mơdrŏng, rơkê plĕng; thôn pơlê rế xông tơƀrê, hơniâp ro kro mơdrŏng, hmâ ƀă tơxâng rêh tâ, veăng ‘no hnoăng mơjiâng tơnêi têa rế ton rế rơdêi, kro mơdrŏng.