Kố cho roh má 4 Ngế pro xiâm hnê ngăn tơnêi têa ai mâ séa ngăn, mơhnhôk tơdroăng mơjiâng pro tơraih tơƀai Long Thành tung lối 2 hơnăm hiăng hluâ, ăm hlo tơdroăng ki tơmâng má môi dêi Đảng, Tơnêi têa ƀă tơmeăm kố. A roh pêi cheăng a công trương tơdroăng tơkêa bro, pôa Phạm Minh Chính, Ngế pro xiâm hnê ngăn tơnêi têa tối nhên, kố cho tơmeăm mơhno dêi hneăng hôp má XIII dêi Đảng. Xua mê, Ngế pro xiâm hnê ngăn tơnêi têa pơkâ pro kơdroh iâ hâi khế vâ mơjiâng pro tâng pơchông ƀă hdrối mê, ƀă pơkâ la ngiâ hâi lơ 31/12/2025 thế khŏm kêi tơmeăm mơhno kố vâ koh phiu ro Hneăng hôp Đảng lâp tơnêi têa roh má XIV, leh tơbâ 80 hơnăm Mơjiâng tơnêi têa, 50 hơnăm tơleăng lĕm peăng Hdroh tơnêi têa, môi tuăn tơnêi têa.

Ngế pro xiâm hnê ngăn tơnêi têa pơkâ Khu xiâm pơkuâ troăng prôk ƀă rơxế kơtâu thâ tơbleăng râ ai hnoăng troăng mơ’no liăn pro troăng tơƀai xông kơneăng má 2, pôa Lê Thành Long, Ngế pro xiâm phŏ hnê ngăn tơnêi têa pơtối hnê mơhno tơdroăng tơbleăng tơ’nôm tơdroăng xiâm kố a tơdroăng hneăng hôp má 8 Kuô̆k hô̆i hneăng má XV.