VOV4.Xơ Đăng - Pôa Phạm Bình Minh, Ngế pro xiâm phŏ hnê mơhno má môi nếo kĭ Hlá mơ-éa ki kal ‘na tơdroăng thăm rĕng pêi pro ƀă mơ’no liăn cheăng ODA, kơxô̆ liăn kơjo kong têa ê. Hlá mơ-éa kal ai tối nhên: Nôkố, tơdroăng pơreăng COVID-19 hiăng châ mơdât tung lâp tơnêi têa. Hnoăng cheăng thăm mơ’no liăn cheăng tơnêi têa, tung mê ai kơxô̆ liăn ODA, kơxô̆ liăn kơjo kong têa ê (kơxô̆ liăn ODA) châ ngăn môi tiah môi tung mâu troăng pêi ‘’toi mơnhông’’ ki kal vâ pro tơniăn cheăng kâ, pêi pro châ tơƀrê pơkâ mơnhông mơdêk cheăng kâ – rêh ối pơlê pơla hơnăm 2022.

Vâ thăm pêi pro ƀă mơ’no liăn ODA vâ mơdêk châ tơƀrê tơdroăng xúa ƀă kum kal khât tung pro tơniăn ƀă mơnhông cheăng kâ, kum mơ’no liăn cheăng ODA hơnăm 2022 châ 100% pơkâ, Ngế pro xiâm hnê ngăn Chin phuh pơkâ mâu Khu xiâm, kơ koan Tơnêi têa ƀă kong pơlê pơtối hlê plĕng pêi pro kơtăng mâu Pơkâ dêi Đảng, Kuô̆k hô̆i, Chin phuh ƀă hnê mơhno Ngế pro xiâm hnê ngăn Chin phuh ‘na thăm mơ’no liăn cheăng tối tơdjuôm, kơxô̆ liăn ODA tối krê; ngăn hnoăng cheăng mơ’no liăn cheăng ODA cho môi tung mâu hnoăng cheăng kal ki ki xiâm dêi hơnăm 2022 ƀă mâu hơnăm pơtối mê.

A Sa Ly tơplôu [ă tơbleăng