Kơxê lơ 25/3, pôa Phạm Minh Chính, Ngế pro xiâm hnê ngăn Chin phuh pơkuâ Roh hôp Khu hnê mơhno má môi Chin phuh, tơmâng Khu xiâm pơkuâ hnê hriâm ƀă hnê mơjiâng tuăn ngôa rơkê ƀă Khu xiâm pơkuâ ngăn pơkeăng ƀă khăm pơlât tơbleăng ‘na mâu tơdroăng tơkêa bro vâ tơdroăng tơkêa bro ki kal tơbleăng Khu xiâm kal kí.

A roh hôp, pôa Phạm Minh Chính, Ngế pro xiâm hnê ngăn tơnêi têa pơkâ thế chôa ‘lâng hnê rơdâ nâl kong têa Ăng-glê tung hnê hriâm ƀă hnê hriâm phôh thông. Tơdroăng tơkêa bro Pơkâ dêi Khu xiâm pơkuâ hnê hriâm ƀă Hnê mơjiâng châ pơkâ vâ mơdêk ki dâi lĕm hnê hriâm, hnê mơjiâng tuăn ngôa rơkê; mơjiâng, mơnhông tâi tâng kuăn mơngế Việt Nam ai hiâm mơno, tuăn ngôa rơkê, khôi túa lĕm, ivá, ai hiâm mơno lĕm, ivá; mơdêk tơdroăng ki chiâng tơpui kong têa ê, ki má lối cho nâl Ăng-glê tung mâu hngêi trung.

Pôa Phạm Minh Chính, Ngế pro xiâm hnê ngăn tơnêi têa pơkâ thế Khu xiâm pơkuâ hnê hriâm ƀă Hnê mơjiâng tuăn ngôa rơkê tơmâng xo rơkong tơpui a roh hôp, pêi kêi đeăng pơkâ tơbleăng Tơdroăng pơkâ xiâm tơnêi têa ‘na tiô rơxông nếo, mơdêk ki dâi lĕm hnê hriâm hnê mơjiâng tuăn ngôa rơkê. Tơdroăng pơkâ thế chôa ‘lâng hnê nâl kong têa Ăng-glê tung hnê hriâm râ má môi  ƀă hnê hriâm phôh thong. Hnê kuăn mơngế thế tơkŭm hnê hiâm mơno lĕm, tuăn ngôa rơkê, châ chăn mo lĕm, thế ‘nâi kơnó ki lâi lĕm tro ki lâi ôh tá lĕm tro, tuăn ngôa rơkê mê hiăng tối hên laga ‘na châ chăn mo lĕm, ‘na tơdroăng ki ‘nâi kơnó tơdroăng ki lâi lĕm tro ki lâi ôh tá lĕm tro tung pơla kố nah tá hâi châ tơmâng hên. Tơdrêng amê tơmâng troh mâu vâi kuăn muăn, cháu chái a kơpong hơngế, hơngo, tơkăng kong rơlố.