VOV4.Xơ Đăng - Hâi lơ 3/6, Ngế pro xiâm hnê ngăn Chin phuh ai hlá mơ-éa tơbleăng ‘na tơdroăng ki pêi pro ‘na hbrâ mơdât ki ‘mêi dêi drôu ƀier. Hlá mơ-éa dêi Ngế pro xiâm hnê ngăn Chin phuh tối nhên, sap ing apoăng hơnăm troh nôkố, ai mâu rôh tơklô̆m rơxế a troăng prôk pro tơdjâk ó  troh ngế ki vê rơxế cho ngế ki pro xôi ‘na trếo al-kôl drêng vế rơxế a troăng; tung mê, ai mâu kăn ƀô̆, kong chưk, viên chưk, mâu ngế pêi cheăng tung kơ koan tơnêi têa pro xôi ai trếo kôl drêng vê rơxế chiâng pro ai tơdroăng xía vâ a troăng, môi tiah tơdroăng ki xía vâ a troăng a kong măng hâi lơ 2/6/2022 a kong pơlê Bắc Giang pro 3 ngế hlâ.

Vâ mơdât mâu rôh ki tơklâm rơxế a troăng tơdjâk troh ngế ki vê rơxế pro xôi ‘na trếo kôl drêng vê rơxế kơtâu a troăng, Ngế pro xiâm hnê ngăn Chin phuh pơkâ thế mâu khu xiâm, kơvâ cheăng, kơ koan ki tơdâng, kơ koan ối tung Chin phuh, Vi ƀan Tơnêi têa Việt Nam, mâu khu râ pơkuâ tơdroăng kal kí, Vi ƀan hnê ngăn mâu kong pơlê, pơlê kong kân ối tung tơnêi têa ƀă mâu tíu pêi cheăng ki ai tơdjâk troh pơkâ thế pêi pro kơtăng Luât hbrâ mơdât ki ‘mêi ôu ƀiê̆r.

Pơkâ thế kăn ƀô̆, kông chưk, viên chưk, mâu ngế pêi cheăng tung kơ koan, hok tro, sinh viên pêi pro kơtăng mâu tơdroăng pơkâ ‘na mơdât ôu drôu ƀiê̆r; djâ troăng ahdrối pêi pro kơtăng hiăng ôu drôu ƀiê̆r ôh tá chiâng vê rơxế xếo; ai troăng hơlâ pơxâu phâk kơtăng ƀă mâu ngế krê, khu pú hên ki pro xôi.

Katarina Nga tơplôu ƀă tơbleăng