VOV4.Xơ Đăng - Kơxo lơ 1/7, a Dak Lak, pôa Phạm Minh Chính, Ngế pro xiâm hnê ngăn Chin phuh pơkuâ hneăng hôp mơgêi tơdroăng pêi pro tiô pơkâ kơxô̆ 10-NQ/TW hâi lơ 18/10/2011 ƀă mơgêi kơxô̆ 12- NQ/TW hâi lơ 24/10/2011 dêi khu xiâm Kal kí ‘na mơnhông cheăng kâ rêh ối ƀă rak tơniăn ‘na cheăng lêng kơpong Tây Nguyên.  A hneăng hôp, mâu kăn tơkŭm tơpui tơno, tối tơdroăng tơkŭm po tơbleăng ƀă tơdroăng ki hiăng châ pêi pro, ki u ối, ki tơvâ tơvân ƀă ki xiâm kơ’nâi 20 hơnăm pêi pro tiô pơkâ 10-NQ/TW ƀă mơgêi kơxô̆ 12-KL/TW; ‘nâi nhên tíu hnoăng cheăng, rôh ki kal ƀă ki tơdjâk troh dêi kơpong Tây Nguyên ƀă tơdroăng mơnhông cheăng kâ- rêh ối, cheăng lêng, kring tơniăn dêi kơpong peăng Mâ hâi ‘no ‘na hdroh tơnêi têa-Kơpong kĭng têa kơxĭ tơdế tơnêi têa, pái kong têa mơnhông cheăng kâ Việt Nam - Lếo - Kul ƀă lâp tơnêi têa.

Pôa Phạm Minh Chính, Ngế pro xiâm hnê ngăn Chin phuh tơbleăng a hneăng hôp

Tơbleăng a hneăng hôp, pôa Phạm Minh Chính hiăng tối nhên tơmeăm khoăng ki rơdêi, rôh vâ mơnhông hlối mơhno nhên mâu tơdroăng hâi pêi pro, ki ối tơvâ tơvân. Ngế pro xiâm hnê ngăn tơnêi têa tối nhên: mơnhông kơpong Tây Nguyên thế tơkŭm ƀă tơrŭm tơleăng mơnhên tâi tâng tá ‘na cheăng kal kí, tuăn tơmiât, cheăng kâ, rêh ối, hyôh kong prâi, ‘na cheăng lêng, kring tơniăn, rơtế mơnhông cheăng kâ tơmâng troh tơleăng mơnhên tơdroăng rêh ối, luât tŏng kum kuăn ngo, loi tĭng tiô khôp; tơbâ tơdroăng hâk tơngăm, pro tơdroăng ki pơxúa ton nah, mơhno ki lĕm tro dêi kăch măng, tuăn mơ-eăm, púi vâ mơnhông  ing í vá mơ-eăm, tơrŭm môi tuăn mơnhông mơdêk.

Gương tơplôu ƀă tơbleăng