Kơpong tơbăng kroăng Hồng – tíu pêi cheăng ton xŏn ki má môi ki kal ‘na kal kí, cheăng kâ, khôi túa lĕm tro, rêh ối pơlê pơla, kong prâi, cheăng lêng, gâk kring ƀă tơpui kâ ƀă kong têa ê; tíu ki rak hên ki kơnâ khôi túa lĕm tro, ôm hyô ki má môi dêi kuăn pơlê hdroâng kuăn ngo; cho ki tơtêk dêi lâp tơnêi têa. Kơpong ai tíu xiâm, châ ngăn cho péa mot peăng Kơnhŏng dêi tơnêi têa pin ƀă ASEAN ‘na tơdjêp mơnhông cheăng kâ, tê mơdró ƀă kong têa Sinuâ – môi kơchơ mơdró kân rơdâ lâp plâi tơnêi ƀă tơrôu.

A hneăng hôp, Ngế pro xiâm hnê ngăn tơnêi têa Phạm Minh Chính pơkâ thế mâu kăn teăng mâ tơpui tơno, veăng tơpui tung tơdroăng xiâm pơkâ pêi ƀă pơkâ pêi, mơnhông tơmeăm ki tơ’lêi ai ki phá tơ-ê, roh tơ’lêi, ki tơ’lêi tơxup tơbriât, tơdrêng amê tah lôi mâu tơdroăng pá puât, tơkâ hluâ pơloăng mơnúa vâ kơpong mơnhông rĕng, krá tơniăn.