Tiô tối tơbleăng, troh nôkố, Khu xiâm ngăn tơdroăng cheăng pêi hiăng pê klêi hlá mơ-éa tối tơbleăng mơgêi Pơkâ 18-NQ/TW; Tơdroăng tơkêa bro tơ’mot, ăm tơtro, pơhlêh hnoăng cheăng, tơdroăng cheăng pêi, khu kăn ƀă mâu hlá mơ-éa ki tơdjâk troh, tơdrêng ƀă tơdroăng tơkêa bro mơgêi tơdroăng cheăng dêi Khu kăn pơkuâ hnê ngăn Đảng, mơjiâng Đảng ƀô̆ Chin phuh, Đảng ƀô̆, kơ koan tơdâng khu xiâm, kơ koan dêi Chin phuh.

Mâu khu tơrŭm cheăng klêi xing xoăng tơ’mot, tơtro má môi kơdroh sap 35- 40% tíu pêi cheăng xiâm; mâu khu tơrŭm cheăng ối xing xoăng rah ngăn tung tá ƀă kơdroh nếo 15%. Vâ tối mâu khu xiâm ƀă mâu khu tơrŭm cheăng ki tơdâng; rôh apoăng tối kô kơdroh 500 khu pêi cheăng cho ối tung khu xiâm, mâu khu xiâm ki ê.

Tơbleăng a rôh hôp, pôa Phạm Minh Chính, Ngế pro xiâm hnê ngăn tơnêi têa tối, tơdroăng xing xoăng, mơhno ăm tơtro má môi ƀă khu kăn pêi cheăng thế pro ti lâi kal iâ mơngế, pêi cheăng tơkê, rơhéa, tơƀrê rơtế ƀă rah xing xoăng nếo ƀă mơdêk hnoăng cheăng dêi kăn bô̆, mâu ngế pơkuâ kơ koan, mâu ngế pêi cheăng ăm tơnêi têa.

Tung pơla rah xo vâ kơdroh kơxô̆ mơngế pêi cheăng thế mơjiâng,  hdró ngăn  tơdroăng tŏng gum ki tơtro, ki ai pơtối pêi mâu tơdroăng pơkâ cheăng ing hdrối nah troh nôkố. Malối, ƀă mơngế pêi cheăng kĭ tơkêa, Ngế pro xiâm hnê ngăn tơnêi têa pơkâ thế ai luât pơkâ tŏng gum ăm tơtro, ôh tá lôi mơngế pêi cheăng kĭ tơkêa mê tro lŭp.