Kăn hnê ngăn Khu kăn Kuô̆k hô̆i tơrŭm cho pôa Márcio Honaiser mơnhên tối, tơrŭm pơla péa Kuô̆k hô̆i hlo mơnhông tơƀrê tung pơla a chê kố; ăm ‘nâi, Kuô̆k hô̆i râ má péa Brazil ôh ti xê rơhêng vâ mơdêk tơrŭm pơla Brazil - Việt Nam mê ối rơhêng vâ Việt Nam ai tơrŭm cheăng tơniăn lĕm ƀă mâu kong têa peăng hdroh châu Mih, xuân môi tiah pơla Brazil ƀă Khu tơrŭm mâu kong têa Đông Nam Á.

Môi tuăn ƀă mâu rơkong tơpui tối dêi mâu kăn Kuô̆k hô̆i Brazil, Ngế pro xiâm hnê ngăn Chin phuh pơkâ thế Kuô̆k hô̆i râ má péa, Kuô̆k hô̆i râ má môi Brazil ƀă Kuô̆k hô̆i Việt Nam thăm mơdêk tơrŭm, tŏng kum dêi rơpó vâ mơdêk mâu rôh hôp trâm mâ khu râ kăn ƀă pơtroh mâu kăn a mâu rôh hôp tung la ngiâ; mơdêk mâu tơdroăng tơrŭm cheăng pơla péa Kuô̆k hô̆i tung mâu kơvâ cheăng, tối ăm dêi rơpó ki rơkê ‘na mơjiâng luât, mơdêk hnoăng cheăng Kuô̆k hô̆i tung khu pơkuâ tơdroăng kal kí, tơdroăng cheăng tơpui kâ Kuô̆k hŏi, tơrŭm ƀă môi tuăn tŏng kum dêi rơpó a mâu rôh hôp Kuô̆k hô̆i lâp plâi tơnêi.