A rôh tơdah, pôa Phạm Minh Chính - Ngế pro xiâm hnê ngăn tơnêi têa loi khât hneăng lăm pôu, pêi cheăng a Hà Nội ƀă mâu kong pơlê dêi mâu kăn pơ’lăng a rôh tơbâ Hâi pro tơleăng lĕm pơlê kong xiâm Hà Nội lơ 10/10 kô veăng mơnhông tơrŭm cheăng rế tơƀrê, lĕm ƀă ai môi tung péa tung lâp plâi tơnêi pơla Việt Nam - Lếo, xuân môi tiah tơdroăng tơrŭm tiô hmâ ton nah, ki lĕm tro pơla pơlê kong xiâm Hà Nội ƀă pơlê kong xiâm Vientiane.

Ngế pro xiâm hnê ngăn tơnêi têa tối Đảng, Tơnêi têa Việt Nam đi đo pêi ahdrối vâ pơtối rak vế ƀă mơnhông mơdêk tơrŭm cheăng ai môi tung péa tơrŭm cheăng pơla péa tơnêi têa; đi đo môi tuăn, pro tơ‘lêi hlâu tơrŭm cheăng pơla péa pơlê kong xiâm Hà Nội ƀă Vientiane pơtối rak vế hnoăng cheăng tơrŭm pơla péa mâu kong pơlê péa tơnêi têa.

Ngế pro xiâm hnê ngăn tơnêi têa pơkâ thế péa pơlê kong xiâm rơtế ƀă mâu kơ koan, kong pơlê ki tơdjâk troh tơkŭm, mơ-eăm mơdêk tơrŭm cheăng pơla pơlê kong xiâm dêi Vientiane ƀă pơlê kong xiâm Hà Nội ing troăng kân tơdrăng lĕm ‘nâng ‘nâi má môi tâng chiâng, xuân môi tiah tơdjêp pơla péa tơdroăng cheăng kâ, tơdjêp pơla Vientiane ƀă mâu kong pơlê dêi Lếo ƀă mâu kong pơlê dêi Việt Nam ing troăng rơxế lơ treng, kơno têa kơxĭ ƀă hí hé.