Tơbleăng ƀă Ngế pro xiâm hnê ngăn tơnêi têa Phạm Minh Chính rơtế ƀă khu râ kăn pêi cheăng lăm pôu, séa ngăn a tíu tơkôm rơxế lơtreng Hà Nội, Kăn pơkuâ Kŏng ti xiâm troăng rơxế lơtreng Việt Nam Hoàng Gia Khánh tối ăm ‘nâi, hơnăm 2023, kơvâ troăng rơxế lơtreng Việt Nam tối tơdjuôm ƀă Kŏng ti xiâm Troăng rơxế lơtreng tối krê hiăng tơkâ hluâ hên pá puât, tơvâ tơvân, châ mâu tơdroăng châ tơƀrê kal khât.

Pêi lo liăn tâi tâng dêi Kŏng ti xiâm châ 101,7% pơkâ pêi, rơkâ klêi kơ’nâi nâp hnoăng mơhá châ 115% pơkâ pêi, rak tơniăn troăng klông ƀă rơxế kơtâu kơdroh tŭm 03 tơdroăng pơkâ. Ngế pro xiâm hnê ngăn tơnêi têa Phạm Minh Chính klêi kơ’nâi séa ngăn nhên a tíu tơkôm rơxế lơtreng Hà Nội, phiu ro drêng tơmối kheăn kơdeăn kơvâ troăng rơxế lơtreng Việt Nam hiăng tơniăn tơdroăng tê mơdró, tơtrŏng Kŏng ti xâm ôh tá tơngôu, kal pêi kơtăng tâ mê nếo, kô châ tơƀrê hên tâ.

‘Na mơnhên troăng prôk la ngiâ mơnhông troăng klông troăng rơxế Việt Nam, tơtrŏng mơjiâng xiâm kối mơnhông kơmăi kơmok, troăng rơxế lơtreng tiô troăng rơxông nếo; thâ pêi pro châ tơƀrê Troăng pêi ton xŏn mơnhông mơdêk, Pơkâ pêi pêt mơjiâng tê mơdró ƀă mơ’no liăn mơnhông hneăng hơnăm 2021 – 2025 hiăng châ kĭ.