Kơxo lơ 10/11, a Đà Nẵng, Khu pơkuâ ngăn Đảng Kuân khu 5 tơkŭm po Rôh hôp tơbleăng, diâp pơkâ ‘na hnoăng cheăng kăn ƀô̆. Rôh hôp hiăng tơbleăng ƀă diâp pơkâ dêi Ngế pro xiâm hnê ngăn Chin phuh ‘na tơdroăng ki vêh pôk Thiê̆u tươ̆ng Cao Phi Hùng pro kăn phŏ pơkuâ ngăn Kuân khu 5.

A rôh hôp, châ tơdroăng ki pơkâ thế dêi Trung tươ̆ng Thái Đại Ngọc, ngế xiâm pơkuâ ngăn Đảng lêng, ngế cheăng tung tíu xiâm Đảng, ngế cheăng tung khu pơkuâ hnê ngăn Đảng lêng Tơnêi têa, kăn phŏ pơkuâ hnê ngăn Đảng, kăn pơkuâ ngăn Kuân khu 5 hiăng diâp pơkâ ƀă rơkâu Thiê̆u tươ̆ng Cao Phi Hùng.

Thiê̆u tươ̆ng cao Phi Hùng hơnăm kố 58 hơnăm, pơlê xiâm a cheăm Hoài Thanh Tây, pơlê kong krâm Hoài Nhơn, kong pơlê Bình Định. Hơnăm 2018, pôa châ Ngế pro xiâm hnê ngăn Chin phuh pôk pro kăn phŏ pơkuâ ngăn Kuân khu 5 drêng dế ối pro kăn phŏ tí tăng ‘nâi plĕng ăm ngế xiâm pơkuâ ngăn Kuân khu 5, tơdrêng amê hlối châ diâp kơlŏng Thiê̆u tươ̆ng.