A chôu phut trâm mâ mê, pôa Phạm Minh Chính tối nhên, Việt Nam ngăn nhoăm thăm mơdêk tơrŭm tơpui kâ, tơrŭm cheăng ƀă mâu kong têa ối tung kơpong châu Phi, tung mê ai kong têa Burundi. Ngế pro xiâm hnê ngăn hiăng hâk phiu ƀă mơnê Chin phuh Burundi hiăng veăng vâ tơrŭm tŏng kum mơ’no liăn ăm tơdroăng cheăng pơkuâ ngăn hyôh phôn, hyôh Internet dêi khu mơdró kâ Việt Nam a kong têa Burundi, ing mê, veăng kum ăm tơdroăng vâ mơnhông pêi cheăng kâ - rêh ối pơlê pơla a kong têa kố. Pôa Phạm Minh Chính hiăng pâ thế kong têa Burundi tŏng kum pro tơ’lêi hlâu ăm mâu khu mơdró kâ Việt Nam ki dế pêi cheăng a Burundi.

Tơdrêng amê, Ngế pro xiâm hnê ngăn hiăng pơkâ thế péa pâ thăm mơdêk tơrŭm tê mơdró kâ, tơrŭm ‘na hnê tối dêi pú tơdroăng pêi chiâk pêi deăng. Péa pâ vâ môi tuăn kô pơtối thăm tơrŭm ƀă tŏng kum dêi pó a mâu hneăng hôp ƀă hên mâu kong têa ê, klêi mê xuân thăm pro xiâm vâ mơnhông tơrŭm pơlá péa to kong têa ƀă ASEAN, Khu tơrŭm châu Phi ƀă pơla ASEAN ƀă Khu tơrŭm châu Phi.