Tơbleăng tơdroăng lo lăm pêi cheăng Hơnăm rak Tơniăn troăng prôk 2024, Ngế pro xiâm phŏ hnê ngăn Chin phuh Trần Lưu Quang tối nhên, hơnăm 2024, mâu tơdroăng cheăng pơto chơ tơmeăm kô pơtối rế tâk pâ thế tơdroăng ki mơ-eăm dêi tâi tâng khu pơkuâ tơdroăng kal kí tung hnoăng cheăng kố.

Ngế pro xiâm phŏ hnê ngăn tơnêi têa ăm ‘nâi, Túa pơkâ hơnăm rak Tơniăn troăng prôk 2024 dêi Vi ƀan rak tơniăn troăng prôk tơnêi têa ƀă inâi “Athế pêi pro tiô luât vâ mơjiâng túa lĕm tro a troăng prôk tơniăn”. Tung tơdroăng mê, Ngế pro xiâm phŏ hnê ngăn tơnêi têa pơkâ thế mâu Khu xiâm, kơvâ cheăng kong pơlê ƀă mâu khu tơrŭm cheăng kal kí pơlê pơla mơjiâng ƀă tơbleăng pêi pro tro ƀă mâu kơvâ cheăng, hnoăng cheăng ƀă malối cho tơdroăng cheăng dêi kơ koan, tíu pêi cheăng.

Malối cho tơbleăng pêi pro kơtăng, tơƀrê hnoăng cheăng rak vế tơniăn troăng prôk tung pơla Têt Lo hơnăm nếo Giáp Thìn la ngiâ kố ah.