Tơbleăng a rôh leh, Ngế pro xiâm phŏ hnê ngăn tơnêi têa Trần Lưu Quang khĕn kơdeăn tơdroăng kơdôu mơ-eăm dêi Khu xiâm Khoa hok ƀă kơmăi kơmok, Khu rak ngăn Kơpong hngêi kơmăi Hòa Lạc, Vi ƀan pơlê kong kân Hà Nội ƀă mâu Khu xiâm kơvâ cheăng, hiăng ‘no ivá mơjiâng kơpong hngêi kơmăi kơmok ki dâi lĕm mơnhông mơdêk troh hâi kố.

Ngế pro xiâm phŏ hnê ngăn tơnêi têa pơkâ thế Vi ƀan pơlê kong kân Hà Nội klêi tơdah xo rak ngăn Kơpong Hngêi kơmăi kơmok ki dâi lĕm Hòa Lạc kal thế rak tơniăn pơtối rak vế xúa ai pơxúa tung mơjiâng ƀă mơnhông mơdêk ing sap mơjiâng troh nôkố; tơniăn, ví séa ngăn tung tơdroăng mơjiâng, ƀă mơnhông ƀă rak ngăn Kơpong hngêi kơmăi Hòa Lạc; pakĭng mê pơlê kong kân kal pơtối rak vế pêi pro tăng tơnôm liăn ing pa gong pơlê kong kân ƀă mâu liăn ki tro tơdroăng ki ê vâ ai liăn ‘no mơjiâng pro kơpong hngêi kơmok ki dâi lĕm dêi Hòa Lạc.