Kong mê têa kân, tơnêi tơhnah hiăng pro 3 ngế hlâ ƀă hía a cheăm Mường Lang, tung mê ai 1 ngế muăn 5 hơnăm. Pakĭng mê, kong mê kân hiăng lân lối 40 ha klâng báu dêi kuăn pơlê; 6 toăng hngêi tro tơnêi tơhnah, tung mê, 3 rơpŏng athế lăm ối a tíu ê, 3 rơpŏng dế ‘mâi rơnêu dêi mâu kế tơmeăm ki tơ’nhiê.

Nôkố, tơring Phù Yên dế pơtối hnê mơhno khu ki ai tơdjâk troh tơbleăng tí tăng ngế ki hía ki u ối, mơhnhôk kuăn pơlê, kăn ƀô̆, kong chưk Vi ƀan hnê ngăn tơring rơtế ƀă cheăm lăm pôe xo báu ki tá hâi poê. Pôa Nguyễn Hoàng Hiệp tơmâng xo mâu ivá mơ-eăm dêi tơring Phù Yên tung hnoăng cheăng ‘mâi rơnêu kế tơmeăm klêi kong mê têa kân, tí tăng mâu ngế ki hía. Tơdrêng a mê hlối pơkâ thế kong pơlê Sơn La ƀă tơring Phù Yên pơtối séa ngăn ‘mâi rơnêu mâu kế tơmeăm ki tro tơ’nhiê klêi kơ’nâi kong mê khía mơhot têa kân pro, rĕng bro tơniăn tơdroăng rêh ối ƀă pêi cheăng ăm kuăn pơlê.