Ngế xiâm ngăn liăn ngân Hồ Đức Phớc hiăng ai rôh pêi cheăng pơla péa pâ ƀă Ngế xiâm ngăn liăn ngân Australia, ngế pơkuâ liăn ngân dêi Nhuk ƀă Ngế xiâm pơkuâ ngăn liăn ngân Singapore, drêng veăng hôp a Rôh hôp Ngế xiâm pơkuâ ngăn liăn ngân APEC 2023, a Mih.A rôh tơdah pôa Jim Chalmers, Ngế xiâm ngăn liăn ngân Australia, péa ngế xiâm ngăn liăn ngân hiăng tơpui ‘na tơdroăng cheăng tung la ngiâ cheăng kâ Đông Nam Á troh hơnăm 2040 dêi Australia; tơrŭm ‘na kong prâi hơ’lêh ƀă liăn ngân krá tơniăn.

Tiô Ngế xiâm ngăn liăn ngân Hồ Đức Phớc, Khu xiâm rak liăn ngân Việt Nam rơhêng vâ Australia đi đo ngăn nhuô̆m tơrŭm cheăng ƀă kong têa tơrŭm cheăng tung la ngiâ ƀă Việt Nam. A rôh tơdah ngế pơkuâ ‘na pơkuâ ngăn liăn ngân Nhuk Katsuo Yakura, Ngế xiâm ngăn liăn ngân Hồ Đức Phớc vêh tối rơdêi tơrŭm cheăng pơla péa pâ pơla Chin phuh Việt Nam ƀă Chin phuh Nhuk krá tơniăn bă mơnhông tiô khế hơnăm.