Klêi kơ’nâi Leh tơdah, Đăi tươ̆ng Phan Văn Giang ƀă Đăi tươ̆ng Tea Seiha, hiăng rơtế pơkuâ tơpui tơno pơla péa khu râ kăn. Péa pâ môi tuăn kheăn kơdeăn, tung pơla kố nah, tơrŭm cheăng lêng pơla péa tơnêi têa châ tơƀrê hên, pơtối cho mâu tơdroăng kal ki xiâm tung tơrŭm cheăng pơla péa tơnêi têa.

Tơpui tơno khu râ kăn xiâm, ki má lối cho khu râ kăn xiâm châ rak châ tơƀrê; mâu pơkâ pêi tơrŭm cheăng lêng châ mơjiâng ƀă pêi pro châ tơƀrê hên, djâ tơrŭm cheăng lêng pơla péa pâ mơnhông mơdêk trâu hơhngế tŭm têk. Tung la ngiâ, péa pâ môi tuăn thăm tơrŭm, pơtối pêi pro châ tơƀrê pơkâ kơthô hneăng hơnăm 2019 – 2024 ƀă pơkâ tơrŭm cheăng rêm hơnăm, djâ tơrŭm cheăng lêng mơnhông râ a’ngêi nếo, veăng kum hên tung tơdroăng mơnhông mơdêk lĕm dêi tơrŭm cheăng tơnêi têa achê dêi pó lĕm tro, tơrŭm nhŏng o tiô khôi vâi krâ nah, tơrŭm tŭm têk, krá tơniăn ton xŏn pơla Việt Nam ƀă Kul.