Tiô rơkong krếo thế dêi ngế cheăng tung khu xiâm kal kí, kăn pơkuâ Ƀơrô cheăng Vi ƀan cheăng tơpui kâ Tíu xiâm Đảng Kŏng san, Ngế xiâm tơpui kâ Tơnêi têa Kŏng hoa Nhân yân Trung Hoa Vương Nghị, mê, ngế xiâm tơpui kâ tơnêi têa pin Bùi Thanh Sơn hiăng pơkuâ djâ khu kăn Việt Nam veăng hôp a Rôh hôp.

Tơpui a Rôh hôp, ngế xiâm tơpui kâ Bùi Thanh Sơn tối nhên, Việt Nam ngăn nhuô̆m ƀă pơtối veăng kum ăm tơrŭm cheăng pơla 6 to kong têa. Tơmiât troh pơkâ mơjiâng tơdroăng cheăng tung la ngiâ tơniăn lĕm ăm kuăn pơlê, Ngế xiâm tơpui kâ hiăng pơkâ mơ’no pŭn khu tơdroăng ki châ kơjo kum tơrŭm cheăng MLC tung la ngiâ, tung mê ai mơjiâng mâu kơvâ cheăng ƀă kơmăi kơmok krá tơniăn, rế hía rế hơ’lêh sap ing pêi ƀă kŏng, krâ mâu tơdroăng tơmiât hriăn ngăn, kơchuâ chêh ƀă mơjiâng bro, hơ’lêh kơxô̆ ing tơpui kâ troăng hơlâ cheăng kâ ƀă gâk kring măng, tơrŭm mơjiâng mâu ngế cheăng kơxô̆, pơlê kong kân rơkê, hơ’lêh mâu khu mơdró kâ ki kŭn khât, krâ kơvâ ƀă kŭn.