VOV4.Xơ Đăng - Mâu hâi hdrối nah, mâu ngế ki lâi hâk vâ Đà Lạt, hâk vâ mơngơik ngiât dêi mâu ƀăng tơnêi kong loăng hngó pơrá kơdrâ drêng ‘nâi tơdroăng ki ai lối hrĭng to xiâm loăng hngó a kong rak kơnhŏng têa tro khu ‘mêi kếo kơdong hên hĭn. Tá kăn pơkuâ kong pơlê ƀă mâu kơ koan ki ai tơdjâk dêi kong pơlê Lâm Đồng xuân kơdrâ drêng hlo tơdroăng kố. Mê châ ngăn cho rôh ko ‘nhiê kong hên má môi sap ing nah troh nôkố a pơlê kong kơdrâm Đà Lạt. Mâu ngế ki ko ‘nhiê kong mê vâi ôh tá ‘nâi xâu, ôh tá hmâng luât.

Ing troăng tơnêi têa 27C, lăm troăng kong tiô troăng peăng kơnhŏng dâng 3 km nếo troh tíu ai roh kếo kong kân ó kố cho a lô A, lô B, khoăng 15, xá 144B, bêng 8, pơlê kong kơdrâm Đà Lạt, Lâm Đồng. Kố cho kong tât khía ối a kơpong tơkăng pơla tơring Lạc Dương ƀă Đà Lạt, kơpong kong xua Khu pơkuâ kong Lâm Viên pơkuâ. Hrĭng xiâm loăng hngó pái kơtâ hlá tro kếo kơdong a ngo, rơtâ tá cho mơngiơk ngiât lĕm dêi mâu kong loăng hngó drêh ngiât ƀă lĕm.

Akố, pakĭng kếo tâi tâng mâu loăng hngó ki kân, kŭn, mâu ngế kếo loăng ối kếo rêm kơpong loăng hngó kŭn tung kơpong rơdâ.

Trung tă Phạm Thị Thu Hiền, Đô̆i Kan sát séa ngăn mâu ngế pro xôi ‘na cheăng kâ, pro kŏng an pơlê kong kơdrâm Đà Lạt, khu pêi cheăng dêi khu khăm ngăn tíu ko ‘nhê kong kố hiăng tối, tơdroăng kếo loăng kố cho khên tơnôu ‘nâng ôh tá bê xâu kơbố, mâu ngế kố râng kơmăi uâ  loăng vâ kếo hên hĭn loăng. Ƀă kơxô̆ loăng kếo lối 400 xiâm loăng hngó tro kếo kơtong môi tiah kố mê ôh tá kâi vâ kếo bu tung môi hâi.

‘’Pá châm nếo kếo hâi hnah, hmôi hnah, u ối tíu kố mê kô chiâng vâ kếo ton tâ xua hlá loăng hngó hiăng rêa trĭng. Mê cho hiăng kếo ton hâi, pêi đi đo a kố, bu kơtăn dêi pó 2 – 3 hâi kếo môi xôh tê’’.

Tíu roh kếo loăng hngó kơtong hên hĭn a pôh xá 144B, bêng 8, pơlê kong kơdrâm Đà Lạt, Lâm Đồng

Pakĭng khên tơnôu, ôh tá bê xâu kơbố ƀă ngăn luât ôh tá lo ki klâi, mâu ngế kếo loăng ối cho mâu ngế ki hiăng hmâ kếo loăng, rơkê ƀĕng tung tơdroăng kếo loăng kong. Mơnhên tơdroăng kố, mê cho a mâu tíu ki uâ a xiâm loăng hngó mê cho uâ rơkê, tơdrăng lĕm; loăng hngó kơtong ing hên troăng tâu kơpêng dêi pó laga ôh tá kreăng dêi rơpó, tơđôu tâu kơpêng lĕm môi tiah kuăn pơlê pôe xo tơmeăm ing pêi chiâk deăng.

Pakĭng mê, tíu loăng kong tro kếo kơdong cho ối a tơkăng kong dêi kơpong tơkăng ối tung kơpong kong xua Khu pơkuâ kong Lâm Viên pơkuâ. Tơdroăng kố bu ai mơngế ki plĕng, ‘nâi tíu kong kố lơ ai tơdroăng veăng kum, mơhno tíu dêi mâu ngế tung kơvâ pơkuâ gak ngăn kong nếo ‘nâi mơnhên tíu kố.

Xua tíu kếo loăng kong hơngế kơpong kuăn pơlê rêh ối ƀă tung kơpong rơdâ, troh kơxo lơ 18/5, mâu kơ koan cheăng xuân ối dế pơtối séa ngăn tíu kếo loăng kong, riân kơxô̆ loăng kong tro kếo lơ tro lŭp. Tiô pôa Lê Thái Sơn, kăn pơkuâ gqak ngăn kong pơlê kong kơdrâm Đà Lạt, tíu kong tro ko ‘nhê ối trâu tung kong, tơdroăng prôk lăm vâ pêt mơjiâng tơmeăm khoăng ƀă pơto loăng cho tơdroăng ki pá, xua mê xiâm kối kếo ‘nhê kong cho pá vâ mơnhên.

‘’Tíu tro kếo ‘nhê kong cho kơpong tơnêi pá vâ prôk lăm, ối tung dế kong, ôh tá ai troăng prôk, ôh tá achê chiâk deăng. Klêi kơ’nâi châ hlo tíu kong tro ko ‘nhê, khu cheăng dêi pơlê kong kơdrâm Đà Lạt thăm séa ngăn, ti tăng mơngế kếo loăng kong’’.

Tơdrêng amê, pôa Nguyễn Văn Sơn, Kăn phŏ hnê ngăn Vi ƀan pơlê kong kơdrâm Đà Lạt tối, kố cho roh kếo loăng kong hngó kân má môi sap ing hdrối nah troh nôkố tung pơlê kong kơdrâm. Kơpong kố ngo ngối rơnâk, pá vâ prôk lăm, châ ngăn cho kơpong iâ tơdjâk troh kong.

Tíu roh kếo loăng hngó kơtong hên hĭn a pôh xá 144B, bêng 8, pơlê kong kơdrâm Đà Lạt, Lâm Đồng

Xua mê roh kếo ‘nhê kong hiăng pro kăn pơkuâ pơlê kong kơdrâm kơdrâ păng ‘nâng. Ƀă kố xuân cho xiâm kối chiâng ai tơdroăng châ hlo hrá, ôh tá teăm tơdrêng. Xuân tiô pôa Sơn, pakĭng kơxô̆ kong tro kếo kơdong ai lối 100 xiâm loăng hngó ki ê tung kơpong pong, ok pơkeăng a xiâm loăng ăm xiâm loăng hlâ chôa ‘lâng. Nôkố roh tơdroăng dế châ kơ koan cheăng thâ séa ngăn vâ ‘nâi nhên xiâm kối.

‘’Mơnhên apoăng cho kơpong ôh tá tơ’lêi ai tơdroăng kếo ‘nhê kong mê tơdroăng séa ngăn kô kơdroh. Xua ôh tá mơnhên mê cho kơpong ki ôh tá tơ’lêi ai tơdroăng kếo ‘nhê kong xua mê nếo hrá châ hlo. Ƀă xiâm kối kếo ‘nhê kong mê troh a tíu kong mê kô mơnhên hlo tơdrêng, laga ƀă roh ko ‘nhê kong mê xuân tá hâi mơnhên ‘nâi. Pơlê kong kơdrâm dế hnê mơhno kơ koan kŏng an ƀă mâu kơvâ tơkŭm séa ngăn, thế tăng châ hlo ngế ki kếo ‘nhê kong kố vâ pơxâu phak kơtăng. Tơdrêng amê mơnhên xiâm kối dêi tơdroăng kếo ‘nhê kong’’.

Drêng ai tơdroăng ki kân kố dêi roh tơdroăng kếo ‘nhê kong, hâi lơ 17/5, Vi ƀan kong pơlê Lâm Đồng ai mơ-éa hnê mơhno mâu kơ koan cheăng thâ séa ngăn, pơxâu phak kơtăng ƀă tơbleăng tơdrăng roh kếo ‘nhê kong ôh tá tro luât kố.

Tíu roh kếo loăng hngó kơtong hên hĭn a pôh xá 144B, bêng 8, pơlê kong kơdrâm Đà Lạt, Lâm Đồng

Rơtế amê, pakĭng pơkâ tíu cheăng pơkuâ kong thâ mơjiâng pro pơkâ pêt kong, vêh tơniăn pêt kong a tung ƀăng kong tro ko ‘nhê, Vi ƀan kong pơlê Lâm Đồng ối hnê mơhno kăn hnê ngăn Vi ƀan pơlê kong kơdrâm Đà Lạt tơkŭm vêh séa mơnhên hnoăng cheăng dêi mâu kơ koan, tíu cheăng ƀă ngế krê ki ai tơdjâk vâ pơxâu phâk tiô pơkâ.

Quang Sáng chêh

A Sa Ly tơplôu ƀă tơbleăng