Ai tơdroăng ki hơniâp ro mê cho tiô kơxô̆ chêh tối dêi Khu xiâm Ôm hyô Việt Nam ăm hlo klêi kơ’nâi 11 khế dêi hơnăm 2023, kơvâ ôm hyô Việt Nam hiăng tơdah 11 rơtuh 200 rơpâu ngế tơmối kong têa ê ƀă ƀă ai dâng 100 rơtuh ngế tơmối  tung tơnêi têa, lối 11 rơtuh ngế tơmối kong têa ê, tâk hên luâ tâ 4 hdroh tâng vâ pơchông ngăn ƀă hơnăm 2022. Bu riân troh tâi khế 10 hơnăm 2023, kơvâ ngăn ‘na ôm hyô châ xo 556 rơpâu rơtal liăn. Pôa Nguyễn Công Hoan - Kăn hnê mơhno tối ‘na Khu tơrŭm Ôm hyô Việt Nam tối ăm ‘nâi, ai 4 tíu ki châ pêi tro tiô hnoăng pơcháu, hiăng tơdah châ sap ing 12 troh 13 rơtuh ngế tơmối kong têa ê tung hơnăm kố:

“Peăng Kŏng ti ki pơkuâ ngăn ‘na ôm hyô kố, akố, ngin hlo kô ai tơdjâk hên khât troh tơdroăng cheăng ngin. Tơdroăng ki thăm pro mơdoh hâi măng ki troh pôu ôm dêi theh visa a Việt Nam cho păng ‘nâng cho tơdroăng ki á hlo ga vâ tơbriât tung kơvâ ôm hyô tiah dế nôkố. Ing mê, ga pro ăm tơmối drêng rah xo dêi tíu ki vâ troh a Việt Nam kô ai hên chôu phut vâ veăng lăm ngăn, lăm hlo, châ ‘nâi tơdroăng ôm hyô, ti xê to a tơnêi têa Việt Nam mê ối ai mâu kong têa ki ối tâ tá achê mê”.

“Ki má môi, mê cho troăng hơlâ ki tah lôi visa, túa ki hbru ăm visa châ pêi pro điê̆n tưh hiăng châ xêt khât ing hâi lơ 15/8/2023. Ki má péa nếo, hơnăm 2023 cheăng tơrŭm tơpui kâ dêi Việt Nam châ pêi pro tơtro khât. Ƀă mâu troăng hơlâ ki mê hiăng pơtối mơdêk ki tơƀrê khât tơdroăng ki kơhnâ tung mơđah tơbleăng tơnêi têa, kuăn mơngế Việt Nam ƀă tơ’mot tơmối mot ôm hyô. Ki má pái, troăng hơlâ ki vâ ‘mâi rơnêu túa lĕm tro, mâu tơmeăm khoăng ki ai tơdjâk túa lĕm tro dêi Việt Nam hiăng châ mơnhên tối chiâng mâu tơmeăm khoăng ôm hyô ki lĕm lih, kơnía kơnâ, phá krê xêh, mơnguân tơmối ôm hyô ƀă kơnâ châ tơmối rơhêng tơbriât vâ rôe. Ki má pŭn, tíu ôm hyô lâp plâi tơnêi hiăng vêh ‘mâi mơnhông, mâu kơchơ tiô khôi hmâ pin hiăng châ vêh mơnhông ƀă kơxô̆ tơmối lăm troh a Việt Nam xuân hiăng pơtối mơnhông tâk kơdrâm môi tiah hdrối pơreăng nah”.

Vâ pơtối mơdêk ki ó rơdêi ƀă tăng troăng ki mơnhông mơdêk ki krê xêh tung hơnăm 2024, tiô mâu ngế ki hriăn plĕng ƀă khu mơdró kâ ing ôm hyô, mâu khu mơdró kâ, mâu kong pơlê, pơlê kong kân ƀă rêm râ kal tơkŭm a mâu tơdroăng cheăng ki kal tiah kố. La ki ahdrối tâ, hneăng roh kố cho roh ki “kơnía” châ tơ’mot tơmối lâp plâi tơnêi, xua mê, kal athế thăm mơdêk pêi pro tiô pơkâ kơxô̆ 82 dêi Chin puh ƀă ai hên túa cheăng ki ó rơdêi. Tơdrêng ƀă Hà Nội ƀă Pơlê kong kân Hồ Chí Minh, mâu kong pơlê, pơlê kong kân akố xuân hiăng thăm mơdêk tơkŭm po mâu tơdroăng koh tơdah Têt hơnăm nếo, riân tiô Mâ hâi, cho vâ thăm mơdêk tơ’mot tơmối mot ôm hyô. Pôa Nguyuễn Trùng Khánh-Kăn ngăn ‘na ôm hyô tơnêi têa Việt Nam tối ăm ‘nâi:

“Rơnó ki ai hên tơmối kong têa ê troh pôu, xah ôm hêi cho sap ing khế 10 hdrối troh a khế 4 hơnăm kơ’nâi. Mâu khu mơdró kâ - ôm hyô Việt Nam dế hbrâ mơjiâng, pêi pro mơ’no chiâng tơmeăm khoăng ôm hyô ki nếo ƀă thăm mơdêk hnoăng cheăng ki vâ tơbleăng, mơđah mơhno tơmeăm khoăng mê troh a mâu tơmói kong têa ê, ki rơhêng vâ tối cho veăng po, lăm ngăn tíu ôm hyô lâp plâi tơnêi ki kân, ai hên mâu tíu ôm hyô lâp plâi tơnêi tiô túa hnoăng cheăng tơná hmâ pêi pro”.

Vêh ngăn ƀă hơnăm 2023, maluâ tơmối ôm hyô kong têa ê lăm pôu ngăn hiăng tâk hên, la ki păng ‘nâng, la tâng vâ pơchông ngăn ƀă mâu kong têa ki ê tung kơpong mê ối iâ. Tiô pôa Vũ Thế Bình - Kăn pơkuâ hnê ngăn Khu tơrŭm Ôm hyô Việt Nam tối, rơtế ƀă tơdroăng pơtối mơdêk tơdroăng cheăng vâ tơ’mot tơmối ôm hyô a mâu tơnêi tíu ki lĕm krip, mê kal athế thăm mơdêk tơdroăng tơ’mot hên mâu tơmối ing kơpong châu Âu ƀă mâu kong têa ki ối hơngế nếo.

“Tơmối kong têa ê cho môi tung mâu khu ki xiâm ki kal ki kơvâ ôm hyô Việt Nam athế châ tơ’mot vâi. Vâ koh tơdah tơmối kong têa ê mê kal ai mâu tơmeăm khoăng ki nếo, túa tê mơdró kal tơtro ƀă tơmối lâp plâi tơnêi. Tiú ki troh pôu ngăn, ôm hyô ki nếo hiăng hơ’lêh nếo, mê mâu tíu ki hơngế, kong pơlê ki hơngế, thăm nếo tá mâu kong têa ki ê hơngế xuân kal, ai tơdjâk troh tơdroăng rêh ối, pêi cheăng, ôm hyô dêi kong pơlê, dêi tơnêi têa pin”.

Ƀă mâu tíu ôm hyô tung tơnêi têa tối, maluâ hơnăm 2023 ai hên tơmối lăm troh, la tiô mâu Kŏng ti ki ngăn ‘na ôm hyô tối, kơxô̆ liăn ki pêi lo ing tơdroăng ôm hyô tung tơnêi têa tá hâi châ plah tiô hiâm mơno pói rơhêng vâ, xua tơdroăng pêi cheăng kâ ối trâm hên xahpá, kuăn pơlê lăm pôu ngăn, ôm hyô ối iâ, kơdui tơdroăng cheăng ki tŏng kum, ăm tê kơtê, prôk lăm iâ hâi, ôh tá xê rah xo tour ki kơnâ liăn hên ƀă prôk lăm ton hâi. Vâ pơtối tơ’mot rơdêi kơxô̆ pơ’leăng mâ tơmối troh ôm hyô tung tơnêi têa, pôa Bùi Thanh Tú-kăn pơkuâ ngăn Marketing Kŏng ti Ôm hyô BestPrice tối tiah kố:

“Ki má môi yă vĕ kơto tơƀai troh a mâu kong pơlê, pơlê kong kân tung tơnêi têa hiăng ‘mâi rơnêu pro kơdroh, rơpâ liăn iâ vâ mơhnhôk kuăn pơlê, tơmối rơhêng vâ ôm hyô. Pin xuân châ hlo, tung hơnăm 2023 ai mâu khế hơnăm ki yă vĕ kơto tơƀai troh a Phú Quốc lơ Nha Trang xuân hiăng to kơnâ, ing mê khoh chiâng pro tơdjâk troh tơdroăng ki prôk lăm ôm hyô dêi kuăn pơlê ƀă tơmối. Ki má péa nếo, mê cho mơnhông cheăng ôm hyô krá kâk ton tá ah, pơkal rak vế ki ai xêh tơmeăm khoăng tung kong kế, ngo ngối, pơlê cheăm, mâ tá ăm mơ’no liăn mơjiâng pro hên tơdroăng lối râ, pro tiô túa chal nếo nôkố, mê tơmối vâi bu rơhêng vâ troh ngăn môi hdroh tê, kơ’nâi ah ôh tá la lâi vâi rơhêng vâ pôu ngăn xếo. Ki má pái, mê mâu kong pơlê, pơlê kong kân kal athế mơhno tơbleăng, mơđah mâu tơdroăng ki kal, ai tơdjâk troh tơdroăng cheăng ôm hyô hnối tơrŭm tá tơdroăng pro nếo tơmeăm khoăng ôm hyô vâ tơ’môt tơmối mot ôm hyô: tung hơnăm hdrối mê hía nah, pin xuân hlo Hà Nội ƀă Festival Rơnó Khía rơxăm Hà Nội, lơ Măng tĭng leh ôm hyô Pơlê kong kân Hồ Chí Minh hiăng pêi pro lĕm tro mâu hnoăng cheăng ki kố vâ tơ’mot tơmối mot ôm hyô a pơlê xiâm dêi tơná”.

A roh hôp Mơnhông kơvâ ôm hyô Việt Nam rĕng, krá tơniăn pơla hdrối kố nah, Ngế pro xiâm hnê ngăn Chin phuh Phạm Minh Chính tối nhên, kơvâ ôm hyô châ mơnhên tối cho môi kơvâ cheăng ki xiâm, veăng kum kal khât ăm tơdroăng tăng cheăng pêi, kơdroh tah kơklêa, xăm kơtiê, tơ’mot mơngế mơ’no liăn cheăng, thăm mơdêk pêi lo liăn ngân ƀă hơ’lêh túa pêi cheăng kâ, rak vế, chôu ‘măn ƀă pơtối mơdêk ki kơnía tiô khôi hmâ, tơdroăng rôh ton nah, túa lĕm tro dêi hdroâng mơngế, mơdêk tơdroăng rêh kâ ối ƀă mơdêk ‘na ki hlê plĕng dêi tuăn mơno dêi kuăn pơlê. Vâ mơnhông ôm hyô chiâng kơvâ cheăng ki tơtêk kro mơdrŏng kân khât tiô tơdroăng pơkâ thế dêi Khu xiâm ngăn cheăng kal kí, tiô Ngế pro xiâm hnê ngăn, ôm hyô Việt Nam kal păng ‘nâng tơdroăng ki hơ’lêh nếo, túa pêi cheăng tơtro ƀă ki hloh hlê rơkê plĕng, tơdrêng, tơƀrê; rak vế, pêi pro “tơrŭm krá kâk, krá tơniăn, tơrŭm cheăng tơtro, tơrŭm tung hên kơvâ cheăng”.