Tơdroăng ki kơhnâ, krâu kơhnâ dêi kŏng nhân cheăng kơpuih văng mơgrúa lĕm kong prâi tơnêi tơníu veăng gum pro ngiât, krúa, lĕm ƀă mơjiâng pơlê kong kơdrâm Đà Lạt chiâng pơlê kong kơdrâm ôm hyô châ vâi ô eăng, pơlê kong kơdrâm Festival reăng Việt Nam, pơlê kong kơdrâm rơkê UNESCO tung kơvâ hơdruê xoăng, pơlê kong kơdrâm rơkê tơmiât troh kơphô̆ kơnía lâp plâi tơnêi. Mơnê tơdroăng veăng gum kơhnâ kố, 181 ngế kŏng nhân châ pơlê kong kơdrâm Đà Lạt pơ-ôu pơ-eăng.

A leh pơ-ôu pơ-eăng, pôa Nguyễn Thái Học, pôu râng kăn pơkuâ hnê ngăn cheăng Đảng Lâm Đồng tối tơdroăng ki tơmâng xo ƀă khê̆n kơdeăn mâu tơdroăng veăng gum dêi mâu kŏng nhân kơpuih văng, mơgrúa lĕm hyôh kong prâi tung tơdroăng rak vế pơlê kong kơdrâm Đà Lạt đi đo krúa, pro lĕm tung hiâm mơno tơmối, malối cho tung khế po Festival reăng Đà Lạt rôh má 10 hơnăm 2024. Tơdrêng amê hlối krếo thế kuăn pơlê athế veăng tơdjuôm ivá rak vế kong prâi tơnêi tơníu ƀă mâu tơdroăng cheăng pêi ai pơxúa.