Bo cheăng Đăk Long, ối tung cheăm Đăk Long, tơring Đăk Glei, kong pơlê Kon Tum; Văng Tắt ối tung kong pơlê Attapeau, kong têa Lếo, nôkố bu cho bo cheăng ki ăm rơxế, mơngế prôk lăm, lăm pôu dêi nhŏng o, pơhlêh kế tơmeăm pơla péa pâ kong pơlê ki tơkoh a tíu tơkăng kong mê kô trâm pá tung tơdroăng vâ po rơdâ tơrŭm cheăng kâ ki kân pơla mâu kong pơlê dêi Việt Nam ƀă mâu kong pơlê dêi kong têa Lếo.

A chôu phut hôp mê, mâu kăn pơkuâ hnê ngăn kong pơlê Kon Tum ƀă kong pơlê Attapeau pơrá tối ăm ‘nâi, tơdroăng ki thăm mơdêk po rơdâ Bo cheăng pơla Đăk Long ƀă Văng Tắt chiâng Bo cheăng ki kân xiâm, kân rơdâ cho kal kân khât, vâ pro tơ’lêi hlâu ăm tơdroăng ki tê rôe, pơhlêh kế tơmeăm, tơdroăng mot lo ƀă dêi pó pơla peá pâ tơnêi têa; mơhnhôk mơnhông kơvâ tơrŭm tung mơ’no liăn cheăng kâ, tê mơdró, tê rôe tơmeăm khoăng, ôm hyô; tơtro ƀă hnoăng cheăng ki vâ mơnhông ‘na pêi cheăng kâ tơdjuôm dêi kơpong, ing mê, mơjiâng pro ‘na kơpong pêi cheăng kâ krá tơniăn ƀă tơtêk kân pơla mâu kong pơlê ki ối pêa Hdroh kong têa Lếo ƀă mâu kong pơlê ki ối a Tơdế tơnêi têa pin ƀă Tây Nguyên.

A chôu phut hôp mê, Khu kăn pơkuâ hnê ngăn kong pơlê Kon Tum ƀă kong pơlê Attapeau, kong têa Lêó hiăng tơpui tơno, vâ môi tuăn tung kĭ tơkêa chêh bro hlá mơ-eá ‘na tơdroăng vâ mơnhông, ‘mâi rơnêu pro Bo cheăng Đăk Long-Văng Tắt chiâng bo cheăng ki kân xiâm păng ‘nâng.