Hdrối mê, Khu kăn hnê ngăn Kŏng ti ngăn on tơhrik Dak Lak hiăng diâp 100 rơtuh liăn ăm Vi ƀan Măt trâ̆n tơnêi têa Việt Nam kong pơlê Dak Lak vâ kum kuăn pơlê mâu kong pơlê peăng kơnhŏng tơkâ luâ xơpá xua tro khía mơhot kân plong mot. Klêi mê, pêi pro tiô tơdroăng krếo thế veăng gum dêi Vi ƀan Măt trâ̆n tơnêi têa Việt Nam, Khu ngăn on tơhrik Dak Lak ối mơhnhôk rêm ngế kăn ƀô̆ mâu ngế pêi cheăng veăng gum môi ngế môi hâi liăn khế kâ ƀă hiăng mơhnhôk châ tâi tâng kơxô̆ liăn 387 rơtuh liăn.

Kơxô̆ liăn ki mê châ pơtroh ăm Khu xiâm ngăn on tơhrik kơpong tơdé tơnêi têa vâ tơkŭm,  pơtroh ăm mâu khu cheăng tŏng kum mâu kuăn pơlê kơpong tro têa lu. Hdrối mê, Khu ngăn on tơhrik Dak Lak xuân hiăng pơtroh kơthô kơ-êng, hơlêm rơtế ƀă kơxô̆ liăn 50 rơtuh pơtroh ăm Khu ngăn on tơhrik Lạng Sơn, veăng gum mâu tíu pro nhŏng o ‘mâi rơnêu mâu trăng kơxái on tơhrik ki hiăng tơ’nhiê klêi kơ’nâi kong prâi pro ôh tá tơniăn.