8.VOV4.Xơ Đăng - Pêi pro tiô khế ki pêi hnoăng cheăng ăm vâi ‘nĕng hơnăm 2022, Kŏng ti ngăn on tơhrik Dak Nông nếo tơkŭm po ƀă pơcháu 450 kơxu tơmeăm ăm mâu vâi ‘nĕng a ƀon Bu Rwah, cheăm Dak Ndrung, tơring Dak Song.

PC Dak Nông đi đo hmâ pêi pro hên tơdroăng cheăng tŏng kum pơlê pro nhŏng o Bu Rwah, tơring Dak Song

Rêm kơxu tơmeăm mê, ai kơƀăn kĕo, têa tôu ro, hlá mơ-eá ƀă hên hĕng mâu tơmeăm ki ê. Drêng kố, mâu droh rơtăm Khu ngăn on tơhrik Dak Nông rơtế ƀă mâu vâi droh rơtăm akố ối tơkŭm pêi pro mâu tơdroăng xah hêi kum ăm vâi ‘nĕng, môi tiah tơdroăng hnê djâ hơdruê xuâng, tơkŭm xah hêi tiô chal vâi krâ rôh nah.

Tơkŭm po mâu tơdroăng xah hêi ăm mâu vâi ‘nĕng, hok tro (um ki pơtro)

Tiô tơdroăng châ ‘nâi ƀon Bu Rwah cho pơlê ki pro nhŏng o ƀă Kŏng ti ngăn on tơhrik Dak Nông. Sap ing hên hơnăm kố, kŏng ti pơrá pêi cheăng tŏng kum ăm mâu rơpŏng ki kơtiê xahpá, rak ngăn mâu vâi hdrêng tung pơlê tơkâ luâ mâu tơdroăng xahpá, loi nguăn ƀă hriâm rơkê.

Katarina Nga tơplôu ƀă tơbleăng