Kơxê lơ 30/10, Khu râng liăn hbrâ mơdât hlâ rong châu Á (khĕn cho khu râng liăn AIP) tơrŭm ƀă Khu ngăn tơdroăng tơniăn troăng prôk kong pơlê Gia Lai tơkŭm po mơgêi 5 hơnăm pêi pro tơdroăng tơkêa “Kơdroh kơto têi – Hngêi trung hriâm tơniăn” a pơlê kong kơdrâm Plei Ku. Rôh hôp mơnhên tối, klêi kơ’nâi 5 hơnăm tơbleăng tơdroăng tơkêa, Pơlê kong kơdrâm Plei Ku hiăng chiâng pơlê kong kơdrâm tiô túa ăm kơpong hngêi trung hriâm tơniăn a kong pơlê ƀă kơpong Tây Nguyên.

Tiô mơnhên tối dêi Khu ngăn troăng prôk ƀă rơxế kơtâu Gia Lai, klêi kơ’nâi 5 hơnăm tơbleăng tơdroăng tơkêa, a pơlê kong kơdrâm Plei Ku hiăng ai 33 to hngêi trung râ má môi châ rơnêu kơpong troăng prôk chêng, kơpong tơkôm tơdah xo hok tro rak tơniăn; ki kơto têi dêi mâu rơxế a troăng prôk drêng tơkâ luâ kơpong bo cheăng hngêi trung tung pơlê kong kơdrâm cho 30km 1 chôu ƀă pa kong pơlê kong kơdrâm cho 40km 1 chôu.

Tung kơxô̆ ki kố 71% châ mơnhên tơniăn a kơlo 5 hơlŏng. Tơdroăng tơkêa kố hiăng kum pro kơdroh hên kơxô̆ ngế hlâ rong ƀă kơxô̆ rôh tơklâm rơxế a troăng prôk tung kơpong hngêi trung hriâm. Nôkố, kong pơlê xuân hiăng pơkâ tơdroăng ki rơnêu 56 to hngêi trung hriâm a mâu troăng prôk lăm kong pơlê tung hneăng la ngiâ ƀă tơmiât troh tơdroăng ki tơbleăng túa pơkâ kố tung lâp kong pơlê, malối cho a mâu cheăm kơpong hngế hngo.