Tung pơla liăn hâi hâi châ tơdâng tơ’mô vâ ‘no mơjiâng pro troăng kân tơdrăng lĕm mê, hlối pêi tiô troăng hơlâ pơlêh rêh ối pơlê pơla, Khu xiâm ngăn troăng prôk thế tơrŭm ƀă Vi ƀan Kuăn pơlê kong pơlê Tiền Giang tơbleăng ƀă châ Ngế pro xiâm phŏ hnê ngăn tơnêi têa tối vâ pơcháu ăm Khu xiâm tăng ngăn ‘no liăn cheăng pro rơdâ troăng kân tơdrăng lĕm Pơlê kong kân Hồ Chí Minh - Trung Lương - Mỹ Thuận  tiô troăng hơlâ PPP (‘no liăn tiô tơdroăng khu pêi cheăng tơnêi têa) pro troăng kân.

Ing mê, ki xŏn dêi troăng dâng 91km, kơxô̆ liăn ‘no pro rơdâ ngi mơngăn xâu 6-8 troăng rơxế tơluâ, tơtro ƀă ki kân rơdâ dêi troăng hiăng châ gu tơnêi vâ mơjiâng pro. Tối mơgêi a rôh hôp, pôa Trần Hồng Hà - Ngế pro xiâm phŏ hnê ngăn tơnêi têa pơcháu ăm Khu xiâm ngăn troăng prôk rơxế kơtâu tơbleăng tŭm tơdroăng tung pơla tơbleăng pêi tơdroăng tơkêa bro po rơdâ kân troăng ki tơdrăng lĕm dêi pơlê kong kân Hồ Chí Minh - Trung Lương - Mỹ Thuận tung pơla hdrối kố nah; séa ngăn, tăng ngăn hnê mâu tơring kong pơlê rah xo khu ‘no liăn mơjiâng pro tro tiô pơkâ ki nếo ‘na ‘no liăn mơjiâng pro sap hâi lơ 1/1/2025, troăng hơlâ tơvêh liăn ngân pơxiâm ing kơxô̆ liăn ‘no mơjiâng tơmeăm khoăng tơnêi têa vâ mơjiâng pro troăng kân tơdrăng lĕm.