Hên kuăn pơlê tơmâng khât mâu tơdroăng tơdjâk luât pơkâ kŏng đoân; ăm ƀă xúa Ƀaoh hiêm khăm pơlât, Ƀaoh hiêm pơlê pơla. Ƀă mâu tơdroăng kơ-êng dêi râ kăn dêi kong pơlê, kăn hnê ngăn mâu kơvâ cheăng, Vi ƀan Kuăn pơlê kong pơlê Hậu Giang hiăng tiâ tơdrêng ăm kuăn pơlê.

Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế, mâu tơdroăng xơpá dêi kuăn pơlê, kăn hnê ngăn kong pơlê thế hlê rơkong tơpui dêi Pôa Hồ tiah kố, “Tơdroăng ki klâi ôh ta ai pơxúa athế ví”. Ma lối, mâu tơdroăng kuăn pơlê tô tuăn hêng hôu thế rĕng tơleăng mơnhên tối nhên, tơbleăng i tro ăm kuăn pơlê hlê.

Kăn xiâm hnê ngăn Kuô̆k hô̆i tối pơchân, klêi rôh trâm mâ kuăn pơlê kố, Khu kăn Kuô̆k hô̆i kong pơlê Hậu Giang, Vi ƀan Măt trâ̆n tơnêi têa tơkŭm mâu tơdroăng veăng hnê tối tơbleăng ăm Ƀơrô Kuô̆k hô̆i, mâu tơdroăng veăng hnê khê̆n, pơkâ thế râ kăn dêi Chin phuh, mâu kơvâ cheăng veăng tơleăng mơnhên.