VOV4.Xơ Đăng - A tíu pêi cheăng Khu xiâm tơpui kâ, pôa Bùi Thanh Sơn, Ngế xiâm phŏ tơpui kâ hiăng tơdah pôa Saurabh Kumar, Ngế xiâm phŏ tơpui kâ kong têa Ấn Độ klăng roh lăm pôu Việt Nam ƀă rơtế Pơkuâ roh tơpui tơno ‘na kal kí roh má 12 ƀă tơpui tơno troăng pêi ton xŏn roh má 9 pơla Khu xiâm tơpui kâ péa tơnêi têa sap hâi lơ 29 – 31/5/2022.

A roh tơdah, pôa Bùi Thanh Sơn pơkâ thế péa pâ pơtối rơtế dêi pó thăm mơnhông tơdroăng tơrŭm cheăng ki kal môi tiah: Kal kí, tơpui kâ ƀă kong têa ê, cheăng lêng – gak kring, tê mơdró – mơ’no liăn cheăng, khoa hok – kơmăi kơmok, mơhno khôi túa lĕm tro ƀă trâm mâ pơla kuăn pơlê, ki rơhêng vâ tối cho thăm tơrŭm ôm hyô tung pơla péa tơnêi têa hiăng lôu péa tơkăng kong ƀă dế tơkŭm po mâu tơdroăng ki kơnâ vâ leh tơbâ 50 hơnăm Hâi mơjiâng tơrŭm cheăng tơpui kâ (1972 – 2022).

Ngế xiâm phŏ tơpui kâ kong têa Ấn Độ mơnhên Ấn Độ đi đo ngăn Việt Nam cho khu tơrŭm ki kal tung troăng hơlâ ‘’Lo pêi pro tơmiât troh peăng mâ hâi lo’’, tơdrêng amê, tơkêa tơrŭm thăm pêi pro tâ mê nếo tơrŭm cheăng Khu tơrŭm cheăng ton xŏn pơla péa tơnêi têa tung la ngiâ.

A Sa Ly tơplôu ƀă tơbleăng