VOV4.Xơ Đăng - Kơxê lơ 22/6, pôa Bùi Thanh Sơn, Ngế xiâm tơpui kâ hiăng krếo phôn tơpui ƀă Ngế xiâm tơpui kâ kong têa Oman, pôa Sayyid Badr bin Hamad bin Hamood Al Busaidi.  A rôh krếo phôn, péa ngế xiâm tơpui kâ vâ môi tuăn tối ‘na tơmeăm khoăng tơrŭm cheăng pơla péa tơnêi têa Việt Nam ƀă Oman ối kân, malối tung mâu tơdroăng cheăng kâ, tê mơdró, ‘no liăn cheăng, ‘na mơngế pêi cheăng, pêi chiâk, păn ká, cheăng a kơno têa kơxĭ ƀă hía hé.  Pakĭng mê tơpui tơno vâ môi tuăn hên troăng rơhlâ ‘mâi mơnhông ƀă mơdêk tâ nếo tơ-brê tơrŭm cheăng pơla péa tơnêi têa tung la ngiâ.

Pôa Bùi Thanh Sơn, Ngế xiâm tơpui kâ tơpui phôn ƀă ngế xiâm tơpui kâ kong têa Oman

Vâ tơ-brê ăm tơdroăng tơrŭm cheăng kâ, péa pâ tối nhên ki kal tơrŭm tơkŭm po  pêi mâu tơdroăng cheăng tê mơdró, ‘no liăn cheăng mơdêk hnê tối ăm dêi rơpó tơdroăng nếo ai, tơrŭm ƀă khu mơdró péa pâ; mơdêk po hôp tơpui tơno kĭ tơhrâ tơrŭm cheăng ki kal vâ pê klêi tơdroăng ki tro luât tung tơrŭm cheăng pơla péa pâ.

Gương tơplôu ƀă tơbleăng