VOV4.Xơ Đăng - Tiô rơkong krếo thế dêi pôa Bùi Thanh Sơn, Ngế xiâm tơpui kâ tơnêi têa pin, jâ Érika Mouynes, Ngế xiâm tơpui kâ kong têa Panama hiăng troh lăm pôu pêi cheăng a Việt Nam sap hâi lơ 5 – 6/4/2022. A Hngêi tơdah tơmối dêi Chin phuh, pôa Bùi Thanh Sơn hiăng trâm mâ tơpui tơno ƀă jâ Érika Mouynes. Péa pâ hiăng tơbleăng ăm dêi pó ‘na tơdroăng rêm kong têa achê kố; séa ngăn tơdroăng ƀă tơpui tơno troăng thăm tơrŭm cheăng tung mâu troăng kal kí, tơpui kâ ƀă kong têa ê, cheăng kâ, tê mơdró, pêi chiâk deăng ƀă hía hé xuân môi tiah tơrŭm cheăng a mâu hneăng tơpui tơno lâp plâi tơnêi, rêm pâ.

Péa Ngế xiâm xuân tối pói vâ thăm tơrŭm pơla 2 tơnêi têa tung mâu kơvâ ki nếo ối hên tơmeăm mơnhông mơdêk môi tiah pơto tơmeăm troăng têa kơxĭ, hbrâ ví kong prâi hơ’lêh, on tơhrik ki vêh pro ƀă hía hé; tơdrêng amê, tối ăm dêi pó ƀă môi tuăn troăng tơleăng mâu tơdroăng tơxup tơbriât lâp plâi tơnêi ƀă troăng hơniâp lĕm tiô luât lâp plâi tơnêi.

A Sa Ly tơplôu ƀă tơbleăng