Tơbleăng a rôh pêi cheăng, Phŏ ngế pro xiâm hnê ngăn tơnêi têa khĕn kơdeăn ki mơ-eăm mơjiâng tơdroăng cheăng pêi lo tâk hên dêi kong pơlê Gia Lai ƀă Kon Tum, la pơkâ thế pêi pro mâu troăng hơlâ, tơkŭm tâi tâng ki pêi ahdrối nôkố ƀă ton ta ah. Mâu pơlê cheăm tung kong pơlê kal thế hbrâ tơrŭm ƀă mâu khu xiâm, kơvâ cheăng vâ tah ki xơpá tung tơdroăng hâi pêi pro ki pêi oh tá tro, malối cho tơdroăng ‘na on tơhrik.

Phŏ ngế pro xiâm hnê ngăn tơnêi têa tối nhên mâu tơdroăng mơ-eăm ing tơdroăng hmâ pêi sap ing nah mê cho pêi chiâk, túa lĕm tro, ôm hyô kal thế pơtối rak vế. Tung pêi chiâk, péa kong pơlê thế mơdêk xúa kŏng ngê̆ ki dâi lĕm vâ mơdêk pêi lo tơmeăm lĕm krúa, malối ƀă sâm Ngọc Linh dêi Kon Tum kal ai troăng hơlâ mơjiâng hngêi kơmăi pro pơkeăng môi tiah dêi Hàn Quốc. 

Phŏ ngế pro xiâm hnê ngăn tơnêi têa pơkâ thế Gia Lai ƀă Kon Tum thế  mơ-eăm khât tâ nếo, tăng troăng pêi ki kân tâ, tơrŭm krá ƀă mâu khu xiâm, kơvâ cheăng vâ tơkâ luâ mâu pơloăng mơnúa, pơtối rak tơmeăm khoăng ai hlâu, tơniăn cheăng lêng ƀă mơnhông krá ton.