VOV4.Xơ Đăng - Pơtối pêi cheăng a mâu kong pơlê Tây Nguyên, kơxê lơ 28/4, khu râ kăn pêi cheăng dêi Vi ƀan hdroâng kuăn ngo xua pôa Hầu A Lềnh, Ngế xiâm, Kăn pơkuâ Vi ƀan hdroâng kuăn ngo pơkuâ xiâm pơkuâ djâ khu râ kăn hiăng ai roh pêi cheăng ƀă Vi ƀan kong pơlê Dak Lak ‘na tơdroăng pêi cheăng hdroâng kuăn ngo ƀă pêi pro troăng hơlâ hdroâng kuăn ngo; tơdroăng châ tơƀrê pêi pro tơdroăng pơkâ xiâm tơnêi têa mơnhông mơdêk cheăng kâ – rêh ối pơlê pơla kơpong hdroâng kuăn ngo ƀă kong ngo hneăng hơnăm 2021 – 2025 a Dak Lak.

Pôa Hầu A Lềnh, Ngế xiâm, kăn pơkuâ Vi ƀan hdroâng kuăn ngo xông tơpui a roh pêi cheăng

Klêi kơ’nâi tơmâng mâu rơkong tơpui tối a roh pêi cheăng, pôa Hầu A Lềnh kheăn kơdeăn mâu tơdroăng mơ-eăm dêi kong pơlê Dak Lak tung pêi pro mâu troăng hơlâ hdroâng kuăn ngo ƀă tơdroăng pêi pro mâu tơdroăng pơkâ xiâm tơnêi têa tung pơla kố nah. Ngế xiâm pơkâ thế kong pơlê tơmâng tâ mê nếo troh mâu tơdroăng ki phá tơ-ê ‘na tơdroăng kuăn pơlê rêh ối vâ ai mâu troăng hơlâ ki tơtro, châ tơƀrê ăm rêm kơpong, rêm hdroâng kuăn ngo, khŏm mơ-eăm, kơdo  mơjiâng mâu tơdroăng tơkêa bro ki xiâm cho tơdroăng pơkâ xiâm.