VOV4. Xơ Đăng - Hâi lơ 26/4, Khu kăn pêi hnoăng cheăng dêi Vi ƀan Hdroâng kuăn ngo xua poa Hầu A Lềnh, ngế xiâm pơkuâ, kăn hnê ngăn Vi ƀan hdroâng kuăn ngo pro kăn xiâm pơkuâ djâ khu kăn kố hiăng lăm pôu, pêi cheăng a cheăm Ia Mơr, tơring Čư̆ Prông, kong pơlê Gia Lai na tơdroăng pêi pro, tơbleăng hnoăng cheăng hdroâng kuăn ngo tung pơla hdrối nah.

Ia Mơr cho cheăm tơkăng kong dêi tơring Čư̆ Prông. Lâp cheăm ai 5 to thôn, pơlê, ƀă 10 hdroâng kuăn ngo rơtế rêh ối cheăng kâ, tung mê mơngế Jarai châ lối 70%. Cheăm dế rak ngăn lối 14 rơpâu ha kong ƀă tơnêi pêt kong. Cheăm dế mơdêk tơdroăng hnê tối, mơhnhôk kuăn pơlê veăng xo pêt kong ƀă rak ngăn kong, mơnhông cheăng kâ pêi chiâk deăng – pêt kong vâ mơdêk pêi lo liăn.

Pôa Hầu A Lềnh, kăn pơkuâ Vi ƀan Hdroâng kuăn ngo tơpui a rôh pêi cheăng ƀă cheăm Ia Mơr

Tiô pôa Hầu A Lềnh, hnoăng cheăng hdroâng kuăn ngo a Ia Mơr tung pơla hdrối kố nah pêi châ mâu tơdroăng ki tơƀrê. Laga, xua tơnêi pêi kâ dêi kuăn pơlê ối iâ, troăng prôk pá puât, mê tơdroăng rêh ối kuăn pơlê ối trâm hên xơpá. Pôa Hầu A Lềnh hiăng pơkâ mơ’no ƀă kong pơlê ‘na mâu troăng hơlâ va mơdêk mâu tơdroăng ki ai hlâu, ki rơdêi, veăng kum mơdêk rĕng hnoăng cheăng kơdroh kơtiê, malối cho rơpŏng kơtiê hdroâng kuăn ngo; pơkâ thế cheăm tơmâng ngăn rak vế, mơdêk khôi túa lĕm tro krê dêi rêm hdroâng kuăn ngo tơtro ƀă mơjiâng, ‘mâi mơnhông tơrŭm.

Katarina Nga tơplôu ƀă tơbleăng