Hâi lơ 6/10, Roh hôp má 8 Khu xiâm pơkuâ hnê ngăn Đảng hneăng 13 hiăng mot pêi cheăng a hâi má 5. Peăng kơxo, Khu xiâm pơkuâ hnê ngăn Đảng pêi cheăng a Hngêi hôp kân, tơpui tơno ƀă mơgêi 15 hơnăm rak vế, pêi pro tơdroăng Pơkâ dêi Khu xiâm pơkuâ hnê ngăn Đảng hneăng má 10 ‘na mơjiâng khu kăn ki rơkê plĕng tung roh thăm mơdêk pêi cheăng kơmăi kơmok, cheăng chal nếo tơnêi têa. Jâ Trương Thị Mai, Ngế cheăng tung Khu xiâm kal kí, Khu xiâm pơkuâ ngăn, Ngế xiâm tơkŭm po tơdroăng hnê mơhno dêi Tíu xiâm teăng mâ Khu xiâm ngăn ‘na cheăng kal kí pơkuâ ngăn a roh hôp.

A chôu phut pêi cheăng peăng kơxo, Khu xiâm pơkuâ hnê ngăn Đảng pôk tơ’nôm pôa Lê Hoài Trung, Ngế cheăng tung tíu xiâm Đảng, Ngế xiâm tơpui kâ dêi Tíu xiâm Đảng, to pro Ngế cheăng tung Tíu xiâm Đảng hneăng 13. Peăng xêi, Khu xiâm pơkuâ hnê ngăn Đảng pêi cheăng tiô khu, tơpui tơno leăng ‘na Mơgêi 20 hơnăm rak vế, pêi pro Tơdroăng pơkâ dêi Khu xiâm pơkuâ hnê ngăn Đảng hneăng 9 ‘na pơtối mơdêk ivá tơrŭm cheăng tung tâi tâng hdroâng mơngế xua vâ kum kuăn pơlê kro mơdrŏng, tơnêi têa ó rơdêi, pơlê pơla tơdâng, tiô hiâm mơno kuăn pơlê, hloh hlê rơkê plĕng.