VOV4.Xơ Đăng - Kơxê lơ 8/7, a Tíu pêi cheăng Chin phuh, pôa Lê Minh Khái, Kăn pơkuâ hnê ngăn cheăng Đảng, Ngế pro xiâm phŏ hnê ngăn tơnêi têa pơkuâ roh hôp Khu hnê mơhno pơkuâ yă dêi Chin phuh mơgêi tơdroăng pơkuâ yă hiăng hluâ, mơnhên troăng prôk tơdroăng hnê mơhno pơkuâ 6 khế mơ’nui hơnăm. Mơgêi roh hôp, pôa Lê Minh Khái, Ngế pro xiâm phŏ hnê ngăn tơnêi têa tối nhên, tơdroăng pơkuâ yă sap ing kố troh mơ’nui hơnăm kal pơtối pêi pro kơchăng, ƀeăn ƀĕng ƀă hbrâ rế tơniăn mơdât liăn chu rơpâ yă plâ hơnăm 2022 tiô pơkâ Chin phuh ƀă Kuô̆k hô̆i pơcháu, ing mê, pro xiâm kối tơ’lêi hlâu ăm tơdroăng mơdât tung hơnăm la ngiâ.

Ngế pro xiâm phŏ hnê ngăn tơnêi têa pơkâ, mâu Khu xiâm, kơvâ cheăng kong pơlê ôh tá tơngôu ki má lối cho tung pơla yă têa châu, têa kơxăng lâp plâi tơnêi xuân tá hâi kơdroh; tơkŭm ‘nâi tơdroăng hriăn plĕng, mơnhên, tăng troăng pơkuâ ki tơtro má môi.

A Sa Ly tơplôu ƀă tơbleăng