VOV4.Xơ Đăng - Pôa Lê Minh Khái, Ngế pro xiâm phŏ hnê ngăn tơnêi têa hiăng troh lăm pôu tíu pêi cheăng Khu xiâm tê mơdró lâp plâi tơnêi (WHO) a Geneva, kong têa Swiss ƀă pêi cheăng ƀă pôa Trương Hướng Thần, Kăn xiâm phŏ pơkuâ WTO. A roh pêi cheăng, pôa Lê Minh Khái mơnhên Việt Nam nhuô̆m păng ‘nâng hnoăng tíu xiâm dêi WTO tung thăm mơnhông tơdroăng tê mơdró hên troăng ki pro tơ’lêi, tơdrăng, tiô luât, tah lôi mâu tơdroăng pro pá xo hnoăng mơhá, mơdât rtoăng prôk tŏng kum tê mơdró, pói vâ WTO pơtối mơnhông mơdêk hnoăng hnê mơhno vâ thăm mơnhông tê mơdró lâp plâi tơnêi tiô troăng tâi tâng, tơdâng tơ’mô, kum rak tơniăn ƀă tơtêk cheăng kâ.

Tung pơla tơdroăng kal kí ƀă cheăng kâ lâp plâi tơnêi ai hên tơdroăng ôh tá tơniăn, pôa Trương Hướng Thần pói vâ Việt Nam pơtối veăng kum hên tung tơdroăng tơpui tơno a Hneăng hôp Ngế xiâm WTO roh má 12 a khế tơdrốu la ngiâ vâ châ mâu tơdroăng châ tơƀrê, ki má lối tung kơvâ tŏng kum ká xi xŏng ƀă pêi chiâk deăng, ing mê kum thăm mơnhông tê mơdró lâp plâi tơnêi.

A Sa Ly tơplôu ƀă tơbleăng