VOV4.Xơ Đăng - Kơxê lơ 13/6, a tíu pêi cheăng dêi Chin phuh, pôa Lê Minh Khái, Ngế pơkuâ hnê ngăn Đảng, Ngế pro xiâm phŏ hnê ngăn tơnêi têa, Ngế xiâm hnê mơhno ngăn ‘na yă tơmeăm hiăng pơkuâ rôh hôp ƀă mâu khu xiâm, kơvâ cheăng ‘na tơdroăng luât pơkâ yă mâu tơmeăm tê ki kal. Tối mơgêi a rôh hôp, pôa Lê Minh Khái tối nhên, tung 5 khế apoăng hơnăm, ki pá ‘na liăn oh tá kơnâ ó ‘nâng.

Pôa Lê Minh Khái, Ngế pro xiâm phŏ hnê ngăn tơnêi têa pơkuâ hneăng hôp ƀă mâu khu xiâm, kơvâ cheăng ƀă pơkuâ yă mâu tơdroăng ki kal

Xiâm gá xua mâu kong têa pro pơhôi ‘na xuá liăn ngân. Pakĭng mê, klêi pơreăng kân COVID-19  châ séa ngăn, mâu tơdroăng cheăng ‘na pê pro tơmeăm khoăng,  tê mơdró  vêh pêi cheăng môi tiah hdrối nah, mê tơdroăng kal vâ tâk hên. Tung pơla mê, Chin phuh, Ngế pro xiâm hnê ngăn Chin phuh ƀă mâu khu xiâm kơvâ cheăng, kong pơlê hiăng tơbleăng hên troăng hơlâ mơ-eăm pêi tơ-brê. Tối tung la ngiâ, ki xơpá ‘na liăn ôh tá kơnâ kô ối hên tâ mê nếo. Malối yă têa châu têa kơxăg pơtối tâk pro tơdjâk troh yă tê mâu tơmeăm ki ê.  Xua mê,  tơdroăng cheăng pơkuâ ngăn yă dêi  dêi Chin phuh ing nôkố troh mơ’nui hơnăm kô xơpá. Ƀă tơdroăng rak ngăn yă mâu tơmeăm ki kal xúa rêm haia ƀă xúa tung rêh ối dêi kuăn pơlê, Ngế pro xiâm phŏ hnê ngăn tơnêi têa pơkâ thế mâu khu xiâm kơvâ cheăng ing nôkố troh mơ’nui hơnăm, thế séa ngăn tơdroăng tê mơdró, mơdêk tối tơbleăng rĕng, vâ ai troăng rơhlâ pơkuâ ngăn rơkê, tơniăn tơdroăng tê rôe tơmeăm ki pơxúa ăm kuăn pơlê, mơngế rôe xúa, châ tiô tơdroăng pơkâ.

Gương tơplôu ƀă tơbleăng