A rôh hôp, kăn pơkuâ mâu khu xiâm kơvâ cheăng Tơnêi têa hiăng tơpui tơno nhên ƀă mâu khu tơrŭm, khu mơdró kâ ‘na 2 tơdroăng ki kố, hnối tối tiah kố, mê cho rôh tơ’lêi vâ Hngêi rak liăn Tơnêi têa xuân môi tiah mâu khu xiâm kơvâ cheăng tơmâng mâu rơkong tơpui tối pâ thế sap ing khu mơdró kâ, mơnhên tối nhên mâu tơdroăng ki tơdjâk vâ “tăng hlo mâu tíu ki tơdâng” ƀă ai mâu troăng hơlâ pêi tơtro rế tŏng kum khu mơdró kâ rế rak tơniăn tơdroăng ki ăm mung.

Mơgêi rôh hôp, pôa Lê Minh Khái mơnhên tối khât kăn teăng mâ mâu khu xiâm, kơvâ cheăng, khu mơdró kâ, khu tơrŭm hiăng tơpui tơno tơdrăng vâ pêi pro nhên ‘na tơdroăng ki kal pơkâ tơleăng. Tối nhên, Hngêi rak liăn Tơnêi têa ai 2 kơvâ cheăng ki kal, môi cho pơkuâ liăn ngân, rak tơniăn hbrâ mơdât bro mơhrê, tơniăn cheăng kâ kân, mơdêk mơnhông cheăng kâ. Má péa, rak tơniăn mâu khu tơrŭm ăm mung. Kố cho tơdroăng ki pá, pâ thế ai tơdroăng ki tơrŭm mâu troăng hơlâ tơniăn tro, rơkê, tơƀrê.