Koh hâk kơ pôa Charles R. Kaye, kăn pơkuâ Kŏng ti Warburg Pincus, môi tung mâu Khu ki râng liăn ‘no cheăng xiâm dêi Mih troh pôu ƀă pêi cheăng a Việt Nam, pôa Lê Minh Khái, Ngế pro xiâm phŏ hnê ngăn tơnêi têa tối nhên, Việt Nam đi đo ngăn Mih cho môi tung kong têa tơrŭm ki kal xiâm.

Mơnhên tối khât Kŏng ti Warburg Pincus hiăng tơrŭm ƀlêi chiâng ƀă hên khu mơdró kâ ki kân, ki châ vâi loi tơngah dêi Việt Nam, Ngế pro xiâm phŏ hnê ngăn tơnêi têa rơhêng vâ Warburg Pincus pơtối hriăn ngăn, po rơdâ tơrŭm cheăng ƀă mâu khu mơdró kâ Việt Nam, ‘no liăn blêi chiâng tung mâu tơdroăng tơkêa ki nếo, Pơkâ thế Warburg Pincus ƀă mâu kong têa ki kân tung lâp plâi tơnêi kô pơtối cho kông tơdjêp vâ ăm mâu khu ki ‘no liăn cheăng Mih tối krê ƀă mâu kong têa ê tối tơdjuôm troh ‘no liăn aViệt Nam. Tiô tơmiât kô pơtối po rơdâ ‘no liăn cheăng a Việt Nam dêi Khu râng liăn tung la ngiâ, pôa Charles R. Kaye ăm ‘nâi nôkố ai hên khu mơdró kâ ki kân dêi Mih mơnhên tối khât tơdroăng ki tơmâng ngăn troh tơdroăng ‘no liăn cheăng a mâu kơvâ cheăng ki ai hlâu dêi Việt Nam; tơdrêng amê hlối tối mâu tơdroăng ki pâ thế ƀă kăn xiâm pơkuâ Chin phuh Việt Nam.