Mâu kơpong kuăn pơlê ối a cheăm Lợi Hải ai tâi tâng 2.080 rơpŏng, tung mê kuăn ngo Raglai lối 82%. Mâu hơnăm hdrối, kơnôm rơkê hlê plĕng tung pơ’lêh hdrê pêt, mơnăn păn ƀă mâu tơdroăng tơkêa bro kơdroh kơtiê, kuăn pơlê rôh apoăng mơnhông cheăng kâ châ tơƀrê, pê lo hiăng tơniăn tâ. Pakĭng mê, châ tơnêi têa tơmâng tŏng kum, ‘no hrĭng rơtuh liăn mơjiâng pro tŭm mâu  troăng kơxái on tơhrik, pro troăng prôk, pro hngêi pơkeăng, tíu mơ’no têa krúa, ai tiô púi vâ tung rêh ối dêi kuăn pơlê.

Tối tơbleăng a hâi mơdĭng, pôa Lê Minh Khái, Ngế pro xiâm phŏ hnê ngăn tơnêi têa tối nhên, hâi po mơdĭng cho rôh vâ rêm râ Đảng, mâu kăn trâm mâ, tơpui tơno, tơmâng kuăn pơlê tối; tí tăng ‘nâi plĕng tơdroăng kuăn pơlê púi vâ; rơtế ƀă kuăn pơlê tơpui tơno, tơpui tơdroăng mơjiâng pêi pro vâ châ tơƀrê tŭm tơdroăng cheăng ki kal kí, mơnhông cheăng kâ - rêh ối, cheăng lêng kring tơniăn, ing mê mơdêk ki môi tuăn dêi rơpó tung rêh ối, ‘mâi mơnhông tơrŭm môi tuăn tâi tâng hdroâng mơngế.