Ngế pro xiâm phŏ hnê ngăn tơnêi têa pơkâ thế péa pâ tơrŭm krá , mơnhông mơdêk tơ ƀrê “ Tơdroăng tơrŭm cheăng dêi Việt Nam ƀă Swis pơla hơnăm 2021-2024”, ƀă mâu tơdroăng pêi ahdrối cho mơdêk ivá tơbriêt cheăng ăm kơpong cheăng kâ  krê dêi kuăn pơlê, mơnhông cheăng kâ rơkê plĕng, hbrâ ví ƀă pơloăng mơnúa ‘na mơnhông cheăng kâ ƀă hyôh kong prâi hơ ‘lêh.

Việt Nam púi vâ pơtối châ xo tơdroăng tŏng kum dêi Swis ƀă tơdroăng mơ-eăm mơnhông krá tơniăn dêi Việt Nam tung la ngiâ, malối tung mơdêk tơbriêt cheăng dêi tung kơpong cheăng kâ krê, tơrŭm khu mơdró... Púi vâ Swis , tối ‘na hnoăng cheăng, veăng kum Việt Nam mơjiâng tơdroăng hnê hriâm ki dâi lĕm. Kăn xiâm hnê ngăn cheăng kâ, Hnê hriâm ƀă tí tăng hriĕn plĕng dêi kong têa Swis púi vâ ƀă loi khât  tung la ngiâ, khu mơdró Swis kô troh pêi cheăng hên a Việt Nam, hlối púi vâ, a kong têa Swis kô hlo tê  hên tơmeăm ki dâi lĕm dêi Việt Nam.