VOV4. Xơ Đăng - Hâi lơ 26/4, a tíu pêi cheăng Chin phuh, pôa Lê Văn Thành, Ngế pro xiâm phŏ hnê ngăn tơnêi têa pơkuâ roh hôp dêi Hô̆i đong mơnhên pơkâ mơjiâng on tơhrik tơnêi têa hneăng hơnăm 2021 – 2030, tơmiât pêi troh hơnăm 2045 (ối tối cho Pơkâ mơjiâng pro on tơhrik VIII). Mâu rơkong xông tơpui a roh hôp mơhno tơdroăng môi tuăn hên ƀă mâu pơkâ xiâm dêi Pơkâ mơjiâng on tơhrik VIII, ki rơhêng vâ tối cho tơdroăng pơ’lêh pro on tơhrik, troăng hơlâ ƀă troăng pơ’lêh on tơhrik ƀă tơdroăng xing xoăng on tơhrik a mâu kơpong.

Mơgêi a roh hôp, pôa Lê Văn Thành kheăn kơdeăn Pơkâ pêi ai tơdroăng pơ’lêh nếo troăng tơmiât, troăng pêi, tối rơdêi tơdroăng mơjiâng pơkâ pêi cho pơkâ ki pơxúa tơdjuôm cho má môi, tâng kơdĭng châ chât rơtal dollars tung tơdroăng kơdroh mơ’no liăn hnhâng kơxái, kơdroh kơxô̆ liăn pơto tơmeăm kô kum kơdroh yă on tơhrik. Ƀă ki hên phĭu môi tuăn Hô̆i đong mơnhên hiăng tơbleăng ăm pêi pro Pơkâ mơjiâng on tơhrik tơnêi têa hneăng hơnăm 2021 – 2030, tơmiât pêi troh hơnăm 2045.

            A Sa Ly tơplôu ƀă tơbleăng