Tơpui akố, teăng mâ kăn pơkuâ Đảng, Tơnêi têa, pôa Lương Cường, Kăn xiâm hnê ngăn tơnêi têa rơkâu, khĕn kơdeăn mâu tơdroăng ki pêi châ tơƀrê ki kăn ƀô̆, lêng đông mố đô̆i gâk tơkăng kong Bát Mọt rơtế ƀă kuăn pơlê tung kong pơlê hiăng pêi châ tơƀrê tung pơla hdrối kố nah. Tiô kăn xiâm hnê ngăn tơnêi têa, tung la ngiâ ah, tiô tối hdrối tơdroăng cheăng kô pơtối ôh tá tơniăn, pá vâ ‘nâi hdrối; mâu khu xâ, khu tơtrâ vâi tí tăng túa vâ pro tơ’nhiê kăch măng tơnêi têa pin; plâ ‘nhiê, pro tơklâ tơrŭm cheăng pơla péa tơnêi têa Việt Nam ƀă Lếo. Xua mê, hnoăng cheăng rak vế tơniăn krê hnoăng pơkuâ, môi tuăn, tŭm têk tơnêi tơníu dêi Tơnêi têa tung tơdroăng nếo pơkâ mơ’no gá hngăm khât.

Tung tơdroăng mê, Kăn xiâm hnê ngăn tơnêi têa pơkâ thế kăn ƀô̆, lêng đông mố đô̆i gâk tơkăng kong Bát Mọt pơtối mơdêk tro hnoăng cheăng cho khu lêng ki xiâm, khu ki rơkê hmâ rak vế tơdroăng ki hơniâp lĕm, tơniăn vâ mơnhông tơnêi têa tối tơdjuôm ƀă kong pơlê Thanh Hóa tối krê.