Pôa Lương Cường, Kăn xiâm hnê ngăn tơnêi têa mơnhên tối khât cheăm malối ối hên xơpá, la râ Đảng, khu kăn pơkuâ, khu lêng ƀă kuăn pơlê kong pơlê Lai Châu hiăng tơrŭm, mơ-eăm tơkâ luâ mâu tơdroăng xơpá, pơloăng mơnúa, hiăng pêi klêi mâu tơdroăng pơkâ mơ’no, tơdroăng pơkâ pêi mơnhông cheăng kâ, túa lĕm tro, pơlê pơla.

Tơdroăng rêh ối dêi kuăn pơlê a cheăm pơlê hlo pơhlêh khât; tơdroăng cheăng lêng gak kring, tơpui kâ châ ‘mâi mơnhông ƀă thăm mơdêk. Kăn xiâm hnê ngăn tơnêi têa pơkâ thế râ Đảng, khu kăn pơkuâ rêm râ, kơvâ cheăng, mâu khu lêng dêi kong pơlê Lai Châu kal tơkŭm pơkuâ, hnê mơhno, pơkâ kơtăng troăng prôk, troăng hơlâ pơkâ dêi Đảng, troăng pơkâ, luât dêi tơnêi têa, pơtối rak vế, mơnhông khôi hmâ pâ nhuô̆m tơnêi têa, kơhnâ, khên tơnôu hlâ rêh, hiâm mơno ‘nâi tŏng gum dêi rơpó, hâk vâ kơ tơmối dêi khu lêng ƀă kuăn pơlê kong pơlê Lai Châu; mơdêk ivá khu tơrŭm tâi tâng hdroâng mngế, mơnhông tơdroăng púi vâ mơjiâng pơlê xiâm tơnêi têa kró mơdrŏng, pêi pro ƀlêi chiâng tơdroăng cheăng kăch măng, mơdêk tơdroăng rêh ối liăn ngân, hiâm mơno dêi kuăn pơlê ƀă hiâm mơno “Lâp tơnêi têa tơdjuôm ivá xua mâu kơtiê, ôh tá lôi kơbố pá rŏng” ƀă tơdroăng tơnoăng “ ‘Nhiê tah hngêi tơ’nhiê, hngêi kơchoh” tro tiô pơkâ mơhno dêi Chin phuh ƀă Ngế pro xiâm hnê ngăn Chin phuh.